Թուրք երգիչները մեկնել են Բեռլին՝ մասնակցելու Բունդեսթագում Հայոց ցեղասպանության ճանաչման դեմ ցույցին

Այսօր Գերմանիայի Բունդեսթագում կկայանան Հայոց ցեղասպանության ճանաչման վերաբերյալ բանաձևի քննարկումները:

Այդ կապակցությամբ իրենց բողոքը ներկայացնելու համար ավելի քան 10.000 թուրքեր հավաքվել են Բեռլինի պատմական Բրանդենբուրգյան դարպասի դիմաց: Haberya-ի հաղորդմամբ՝ 3 ժամ տևած հակահայկական ցույցին մասնակցելու համար Թուրքիայից Գերմանիա են մեկնել նաև մի շարք հայտնի երգիչներ:

Ցույցին մասնակցող երգիչ Ուղուր Ըշըլաքը գերմանացի խորհրդարանականներին կոչ է արել կանգնել ոչ թե թուրքերի կամ հայերի կողքին, այլև «միայն ու միայն ճշմարտության կողքին»:

Ցույցին մասնակցողների թվում եղել է նաև Եվրոպայի թուրք խորհրդարանականներից Օզան Ջեյհունը, ով թուրքական լրատվական գործակալության հետ զրույցում հիշեցրել է Գերմանիայում Կանաչների կուսակցության ղեկավար Ջեմ Օզերի՝ 2002 թվականի հայտարարությունը: Ջեյհունը հիշեցրել է, որ Օզերն այն ժամանակ քննադատել է Բունդեսթագին՝ «իբրև թե Ցեղասպանության» հարցը քննարկելու համար, սակայն այսօր հակասում է իր հայտարարությանը:

Հիշեցնենք, որ Կանաչների կուսակցությունը ճանաչել է Հայոց ցեղասպանությունը, իսկ կուսակցության ղեկավար Ջեմ Օզերն այդ մասին իր հայտարարությունում չէր բացառել, որ  Բունդեսթագը կճանաչի Հայոց ցեղասպանությունը:

Ջեյհունը, ինչպես և Թուրքիայի քաղաքական  այլ գործիչներ հիշեցրել են «պատմությունը պատմաբաններին թողնելու կարևորությունը»:

«Թող Գերմանիայի խորհրդարանն իր խնդիրներով զբաղվի: Եթե ցեղասպանության մասին ենք խոսում, տեսեք՝ այսօր Գերմանիան մեղադրվում է Նամիբիայում ցեղասպանություն իրականացնելու մեջ: Թող զբաղվեն այնտեղ գերմանական զորքերի իրականացրած ցեղասպանության հարցով: Թող թողնեն, որ Թուրքիան և Հայաստանը, որպես երկու հարևան երկրներ, փորձեն իրենք լուծել այս խնդիրը»,- հայտարարել է Ջեյհունը: