Էրդողանի դեմն առեք. Բունդեսթագում Հայոց ցեղասպանության ճանաչման վերաբերյալ բանաձևի հեղինակ

Գերմանիայում Հայոց ցեղասպանությունը ճանաչած «Կանաչներ» կուսակցության համանախագահ, Բունդեսթագում Հայոց ցեղասպանության ճանաչման վերաբերյալ բանաձևի հեղինակ, ազգությամբ  թուրք  Ջեմ Օզդեմիրը նույնպես արձագանքել է Թուրքիայում ընդդիմադիր Cumhuriyet թերթի դեմ գործողություններին ու դրա աշխատակիցների ձերբակալությանը:

Ըստ Demokrathaber-ի՝ Օզդեմիրը նշել է, որ դաշնային կառավարությունը մտահոգություն է հայտնում Թուրքիայում մամուլի ազատության կապակցությամբ, մինչդեռ Թուրքիայում մամուլի ազատություն չկա: «Ի՞նչ մամուլի ազատություն: Թուրքիայում մամուլի ազատություն գոյություն չունի, հետևաբար՝ մտահոգվելու կարիք էլ չկա»,- ասել է Օզդեմիրը:

Նրա խոսքով՝ Թուրքիան ոչ մի կապ չունի դեմոկրատ լինելու, մարդկային և ազգային փոքրամասնությունների իրավունքների, ինչպես նաև արևմտյան այլ արժեքների հետ: «Որպես այդ արժեքների կրող՝ Արևմտյան աշխարհը պետք է Էրդողանի դեմն առնի»,-հայտարարել է պատգամավորը:

Անդրադառնալով նաև Թուրքիայում մահապատժի վերականգնման ուղղությամբ քննարկումներին՝ Օզդեմիրը նշել է, որ նման դեպքում վերջ կտրվի Եվրամիությանն անդամակցելու բանակցություններին: «Նա, ով ցանկանում է մահապատիժը վերականգնել, կարող է անդամակցել Հյուսիսային Կորեային կամ մեկ ուրիշին, սակայն ոչ երբեք ԵՄ-ին»,- ասել է կուսակցության ղեկավարը: