«Գառնին ջրերի ծով էր, հիմա ուզում են դարձնել ջրերի սով». գառնեցիները ճանապարհ են փակել. լուսանկարներ

Կոտայքի մարզի Գառնի և Գողթ գյուղերի բնակիչներն այս պահին բողոքի ակցիա են իրականացնում. նրանք պահանջում են շինտեխնիկան դուրս բերել Ազատի կիրճից, հակառակ դեպքում` խոստանում են անժամկետ փակել Երևան-Գառնի ավտոճանապարհը. տեղից հայտնում է Yerkir.am-ի թղթակիցը:

Նշենք, որ գառնեցիները պայքարում են Քաղցրաշենի ինքնահոս ոռոգման համակարգի կառուցման ծրագրի դեմ, որով նախատեսվում է Ազատ գետի ջուրը խողովակաշարով տանել դեպի Արարատի մարզ: Գառնեցիները մտահոգություն են հայտնում, որ ծրագրի արդյունքում  Ազատ գետը կցամաքի: Գառնեցի կանանցից մեկը նման միտք հայտնեց. «Գառնին ջրերի ծով էր, հիմա ուզում են դարձնել ջրերի սով»:

Նշենք նաև, որ գառնեցիներին միացած` Գողթ համայնքի բնակիչները բողոքում են, որ Վերահսկիչ պալատի նախագահ Իշխան Զաքարյանը Կարմիր քար կոչվող տարածքում հող է  գնել և այդ հողերը ցանկանում է ոռոգել Գեղարդալճի ջրերով: Այդ դեպքում Գողթ համայնքի բնակիչները կզրկվեն ոռոգման ջրից:

Yerkir.am-ի հետ զրույցում Գառնիի բնակիչ Արուսյակ Այվազյանը նշեց, որ պատրաստ են պայքարել մինչև վերջ և չեն թողնելու, որ իրենց ջրերը ցամաքեցնեն, այնքան ժամանակ են փակելու ճանապարհը, մինչև համապատասխան կառույցները արձագանքեն խնդրին: Այստեղ հավաքված է մոտ 500 մարդ, կան նաև ոստիկաններ: