Ոչ մի առավելություն չեմ տեսնում վիրավոր զինծառայողներին արտերկիր տեղափոխելու մեջ. գերմանացի մասնագետ

Այս օրերին Հայաստանում են գերմանացի բժիշկներ, որոնք այցելել են վիրավոր զինծառայողներին: Այսօր վերականգնողական կլինիկայի ղեկավար, վնասվածքաբան Մարտին Շվարցը լրագրողներին ասաց, որ իրենք այցելել են «Էրեբունի» բուժկենտրոնում բուժում ստացող երկու զինծառայողներին, որոնց վիճակը բժիշկները գնահատում են ծայրահեղ ծանր:

Շվարցը նշեց, որ զինծառայողներից մեկի մոտ կա դրական դինամիկա` նա շարժել է ուսերը:

«Կարող եմ վստահորեն ասել, որ այստեղ բժիշկներն արել են հնարավորը, ինչ ես ինքս կանեի Գերմանիայում: Ճիշտ է, ձեր հիվանդանոցներում տեխնիկական հագեցվածությունը նույնը չէ, ինչ մեզ մոտ, սակայն, կոնկրետ այս դեպքերի հետ կապված, կան անհրաժեշտ սարքավորումները: Այս պահի դրությամբ նպատակահարմար չէ տղաներին արտասահման տեղափոխելը»,- ասաց նա:

Գերմանացի բժիշկը նշեց նաև, որ ոչ ոք չի կարող ասել, թե ինչ կլինի 1 շաբաթ հետո, և ինչ ընթացք կունենա բուժումը: «Սա այն դեպքն է, որ չենք կարող ոչինչ ասել, բայց, ամենայն հավանականությամբ, տղաների մոտ ինչ-ինչ հետքեր կմնան ստացած վիրավորումներից»,- ասաց Շվարցը:

Բժիշկը նշեց նաև, որ իրենք այցելել են Կենտրոնական կլինիկական զինվորական հոսպիտալում բուժում ստացող զինծառայողներին, որտեղ էլ, ըստ նրանց գնահատման, ծանր է երկու զինծառայողի վիճակը: Ըստ Շվարցի` նրանց նույնպես արտերկիր տեղափոխելու կարիք չկա: «Նրանք վիրահատության կամ տեղափոխման կարիք չունեն, և հիմա մնում է սպասենք` հետագա ընթացքը տեսնելու համար»,- ասաց նա: