ԵՏՄ մտնենք, դուրս գանք, հետո նորի՞ց մտնենք. Գարեգին Նուշիկյան

ԱԺ տնտեսական հարցերի մշտական հանձնաժողովի անդամ, ՀՀԿ խմբակցության պատգամավոր Գարեգին Նուշիկյանը Yerkir.am-ի հետ զրույցում անդրադարձավ Հայաստանի` ԵՏՄ-ից դուրս գալու հավանականությանը` ընդգծելով, որ դա մեկ օրվա և ոտքի վրա որոշելու բան չէ:

Հիշեցնենք, որ  «Ազատ դեմոկրատներ» կուսակցության նախագահ, ԱԺ պատգամավոր Խաչատուր Քոքոբելյանը խորհրդարան է ներկայացրել «Եվրասիական տնտեսական միությանը Հայաստանի Հանրապետության անդամակցության դադարեցման գործընթաց սկսելու մասին» հայտարարության նախագիծը:

«Մտածել միշտ էլ պետք է: Ոչ միայն դուրս գալու մասին է պետք մտածել, այլև ԵՏՄ-ում մնալու: Ոտքի վրա նման  որոշումներ չեն կայացնում: Մտնենք, դուրս գանք, հետո նորի՞ց մտնենք: Մոտ մեկ տարի է, որ աշխատում ենք, դեռ շուտ է դրա մասին մտածելը, խոսելը»,- ասաց Նուշիկյանը, ապա հավելեց.  «Ժամանակները չեն համընկնում, որ մենք դրա օգուտները զգանք և հասկանանք: Պրոբլեմներն ամբողջ աշխարհում են: Ռուսաստանում էլ, Ղազախստանում էլ, Բելաոռուսում էլ կան, բոլոր տեղերում էլ պրոբլեմներ կան, և ԵՏՄ-ի մեջ լինել-չլինելը այնքան էլ էական նշանակություն չունի, եթե վիճակը վատ է` վատ է»,- ասաց պատգամավորը:

Անդրադառնալով այն հանգամանքին, որ Ռուսաստանը շարունակում է զենք վաճառել իր ստրատեգիական գործընկեր Հայաստանի հակառակորդ Ադրբեջանին, Նուշիկյանը նշեց` ՌԴ-ն չի թաքցնում, որ Ադրբեջանն էլ է իր ստրատեգիական գործընկերը:

«Մեղադրել  պետք  չէ  ոչ մեկին: Եթե  բացասական  բաներ կան, առաջին հերթին մեր մեջ պետք է ման գանք, հետո նոր մտածենք ուրիշների մասին»,- եզրափակեց պատգամավորը: