Ինչ-որ ահազանգ է եղել. Գարեգին Նուշիկյան

Կառավարության նախորդ նիստում վարչապետ Հովիկ Աբրահամյանը, խոսելով հարկային ստուգումների մասին, նշել է` թեև կարևոր է պետական բյուջեի եկամուտների ապահովման խնդիրը, սակայն, ֆինանսների նախարարության կողմից իրականացվող ստուգումները պետք է իրականացվեն բացառապես ստվերային շրջանառության առկայության դեպքում, ռիսկերի կառավարման համակարգի հիման վրա:

 Կառավարության ղեկավարն ուշագրավ հայտարարությամբ է հանդես եկել. «Հանձնարարում եմ ֆինանսների նախարարին` վերանայել ռիսկայնության չափանիշները` նպատակ հետապնդելով նվազեցնել ստուգումների քանակը: Միաժամանակ հորդորում եմ հարկ վճարողներին՝ չխուսափել հարկերը ժամանակին վճարելուց, բարձրացնել ֆինանսական կարգապահությունը»:

ՀՀԿ խմբակցության պատգամավոր Գարեգին Նուշիկյանը Yerkir.am-ի հետ զրույցում նշեց, որ այս հայտարարությունը ամենայն հավանականությամբ տնտեսվարողներին օգնելու նպատակ ունի:

«Հանրապետության վարչապետն ավելի լավ է տեղեկացված ընդհանուր վիճակից, քան թե որևէ մեկը: Ուրեմն  ինչ-որ բողոքներ, դժգոհություններ են եղել տնտեսվարողներից: Հենց այնպես չէր կարող այդպիսի որոշում կայացվել: Ուրեմն ինչ-որ ահազանգ է եղել, ինչ-որ հարցեր են եղել,  որից բխել է նման որոշում կայացնելու անհրաժշտությունը»,- նշեց պատգամավորը:

 Մեր այն դիտարկմանը, թե այս հայտարարությունը միգուցե Հովիկ Աբրահամյան-Գագիկ Խաչատրյան հակասությունների շրջանակներո՞ւմ է, Գարեգին Նուշիկյանը պատասխանեց.

«Ես ճիշտն ասած նման  տեղեկություն չունեմ, չեմ կարծում,  որ դա է պատճառը: Չեմ կարծում, որ անձնական հարցերը կտեղափոխվեն ընդհանուր դաշտ: Կրկնում եմ, ամենայն հավանականությամբ, տնտեսվարողների կողմից դժգոհություն է եղել: Գաղտնիք չէ, որ տնտեսվարողների համար այնքան էլ հեշտ ժամանակներ չեն, և կառավարությունը դրանով  ուզում է ավելի թեթևացնել տնտեսվարողների վիճակը և ընդառաջ  է գնում նրանց»: