Բրոքերի ինստիտուտը պետական դարձնելը մի փոքր վիճահարույց հարց է. Նուշիկյան

ԱԺ ՀՀԿ խմբակցության պատգամավոր, տնտեսական հարցերի մշտական հանձնաժողովի անդամ Գարեգին Նուշիկյանը Yerkir.am-ի հետ զրույցում, անդրադառնալով  մաքսային ծառայության գործելաոճում սպասվող փոփոխություններին, նշեց, որ միայն ժամանակը կարող է ցույց տալ, թե որ փոփոխությունն ինչ ազդեցություն կարող է ունենալ:

Նշենք, որ փոփոխությունները վերաբերում են այսպես կոչված, «մաքսային փաթեթները» վերացնելուն:  Խոսքը կիլոգրամով խառը ապրանքներ ներկրելու ընթացքում տարիներ շարունակ գործող համակարգի մասին է։ ՊԵԿ նորանշանակ ղեկավար Վարդան Հարությունյանը նաև պատրաստվում է կառավարությանն առաջարկել, որ մաքսային բրոքերի ծառայությունը պետության կողմից մատուցվի։ Ներկայումս այդ ծառայությունը մատուցում են մասնավոր ընկերություններ։

«Բրոքերի ինստիտուտը պետական դարձնելը մի փոքր վիճահարույց հարց է: Բրոքերի  ինստիտուտը նույնպես բիզնես է, բիզնեսով զբաղվելու իրավասություն  ցանկալի չէ, որ պետությունն ունենա»,- ասաց Նուշիկյանը՝ հավելելով, որ դեռ ժամանակ է պետք՝ հասկանալու՝ որ մեթոդը կարող է ավելի արդյունավետ լինել: Խոսելով «մաքսային փաթեթների» վերացման մասին՝ Նուշիկյանն ընդգծեց, որ այդտեղ էլ մտածելու բան կա: «Կարծում եմ՝ դրական ազդեցություն կունենա, բայց այդտեղ էլ մի քիչ մտածելու բան կա, ընդհանուր առմամբ ճիշտ մոտեցում է, եթե կարողանանք կյանքի կոչել»,- ասաց նա: