Պատրաստվել էր պայթեցման եղանակով վնասել ազգականներին. մանրամասներ ավտոբուսի պայթյունի մասին

Արդեն հայտնել ենք, որ ԱԱԾ օպերատիվ-հետախուզական մարմինների հետ համատեղ միջոցներ են ձեռնարկվում դեպքի վայրում հայտնաբերված հեռախոսային քարտի բաժանորդի եւ դեպքի վայրում հայտնաբերված երկրորդ դիակի նույնականացման ուղղությամբ։ Դիակն անճանաչելի է, եւ վերցված փորձանմուշների հիման վրա նշանակվել է ԴՆԹ փորձաքննություն։

Նշենք, որ դեպքի վայրում հայտնաբերված քարտի բաժանորդը ՀՀ քաղաքացի է, նախկինում երկու անգամ դատված։ Նրա բնակության վայրում օրենքով սահմանված կարգով ապրիլի 26-ին իրականացված խուզարկությամբ հայտնաբերվել է «տրոտիլ» տեսակի պայթուցիկ նյութ, պայթուցիչ սարքեր (դետոնատոր) եւ տարբեր տեսակի էլեկտրասարքավորումներ։

Yerkir.am-ի տեղեկություններով` քարտի բաժանորդը նախկինում դատապարտվել է սպանության փորձի համար: Քննչական կոմիտեից մեզ հայտնեցին, որ քննության ընթացքում տվյալներ են ստացվել, որ քարտի բաժանորդը կենցաղային հողի վրա դժգոհություններ է ունեցել ազգականներից և նախապատրաստվել էր պայթեցման եղանակով վնասել նրանց:

Մեզ հասած նախնական վարկածի համաձայն` հավանաբար, հենց նա էլ պայթուցիկ նյութեր է տեղափոխել ավտոբուսով, քանի որ ամենից շատ նրա մարմինն է վնասվել: