Աշխարհը դեռ պարտք ու ասելիք ունի ցեղասպանության կենդանի վկաներին. Հերմինե Նաղդալյանը ներկայացրեց Գալուստ Սահակյանի ելույթը

Այսօր Երևանում մեկնարկած «Ընդդեմ ցեղասպանության հանցագործության» գլոբալ  ֆորումին նախատեսված էր ԱԺ նախագահ Գալուստ Սահակյանի ելույթը: Այն ներկայացրեց ԱԺ նախագահի տեղակալ Հերմինե Նաղդալյանը: Ելույթում նշվեց, որ ցեղասպանությունը որպես մարդկության դեմ ուղղված մեծագույն ու ծանրագույն հանցագործություն, վաղեմության ժամկետ չունի, մանավանդ որ աշխարհը դեռ պարտք ու ասելիք ունի ցեղասպանության կենդանի վկաներին: «Նախևառաջ հոգու ու սրտի ասելիք ունի աշխարհը, արդարության ու ճշմարտության պարտք ունի աշխարհը, անկախ այն բանից` իրավական թե բարոյական դաշտում, պետք է վերադարձվի այդ պարտքը, արդարությունը պահանջում է, ժամանակը՝ պարտադրում»,- ասաց Հերմինե Նաղդալյանը: Ելույթում անդրադարձ եղավ նաև Ադրբեջանի սանձազերծած վերջին ագրեսիվ գործողություններին: «Չեմ կարող չխոսել ապրիլյան ագրեսիայի մասին, որը սանձազերծեց Ադրբեջանը: Դիվանագիտական ասպարեզում ձախողվելով` Բաքուն փորձեց ռազմական ճանապարհով հարց լուծել, նպատակ ունենալով հասնել Ստեփանակերտ և պայմաններ թելադրել բանակցություններում: Ինչ ստացվեց, հայտնի է բոլորին: Ադրբեջանը ոչ միայն տանուլ տվեց բլից-կրիգը, այլև տանուլ տվեց քաղաքական ու դիվանագիտական հաշվարկներում, բայց հասցրեց իր ստորագրությունը թողնել այն տարածքներում, որոնց ընդամենը մի քանի ժամով է տիրել: Ադրբեջանական բանակի կազմում կռվող վարձկանների ձեռքով ԼՂՀ քաղաքացիների շրջանում, ինչպես նաև երեխաների ու ծերերի շրջանում սպանություն, ՊԲ զինվորների խոշտանգում, անարգում, անդամահատում: Այս ձեռագիրը սկիզբ է առնում Օսմանյան կայսրությունից ու ձգվում մինչև մեր օրերը, Ադրբեջանը իրեն հավասար հարթության մեջ դրեց իսլամական պետության ահաբեկչական խմբավորման հետ»,- ասաց Հերմինե Նաղդալյանը: