Հերմինե Նաղդալյանը «շտկեց» Դավիթ Հարությունյանի խոսքը

Այսօր ԱԺ մշտական հանձնաժողովների համատեղ նիստում, երբ քննարկվում էր կառավարության 2013թ. բյուջեի հաշվետվությունը, ԱԺ ՕԵԿ խմբակցության պատգամավոր Հովհաննես Մարգարյանը հարց ուղղեց կառավարության աշխատակազմի ղեկավար-նախարար Դավիթ Հարությունյանին: Նա նշեց, որ վերջերս խորհրդարանի առաջին ընթերցմանը ներկայացмած «Գնումների մասին» օրենքում փոփոխություններ կատարելու մասին օրինագծով փորձ է արվում գաղտնի պահել բարձրաստիճան պետական պաշտոնյաների` ՀՀ նախագահի, ԱԺ նախագահի և վարչապետի ծախսերը: Պատգամավորն ասաց, որ ՕԵԿ-ը դեմ է արտահայտվել այդ օրինագծին, որովհետև համարում է, որ ԱԺ-ն պետք է լիարժեքորեն տեղեկացված լինի այդ ծախսերի մասին:

«Ուզում եմ իմանալ Ձեր տեսակետը, մենք գտնում ենք, որ զուտ ծախսերի մասով` թվային առումով, այդ տեղեկատվությունը պետք է լինի հրապարակային»,- ասաց Հովհաննես Մարգարյանը:

Դավիթ Հարությունյանը նախ նշեց, որ դա շատ լավ հարց է, և իսկապես, հաշվետվողական տեսանկյունից կարևոր է, որ շատ հարցեր լինեն թափանցիկ: Բայց գաղտնի պետք է լինի այդ տեղեկատվության այն մասը, որը կարող է վտանգ ներկայացնել: «Մեկ անգամ ևս կուսումնասիրենք, կաշխատենք այդ ուղղությամբ, մինչև նախագիծը երկրորդ ընթերցմամբ կընդունվի: Բուն ծախսերը չպետք է լինեն գաղտնի: Մենք պետք է մտածենք, թե այդ տեղեկատվության ո՞ր մասն ենք հրապարակում: Թափանցիկ պետք է անենք այն, ինչը առավելագույնս հնարավոր է, բայց պահպանենք այն, ինչը վտանգում է մեր անվտանգությունը»,- ասաց Դավիթ Հարությունյանը:

Հարցին արձագանքեց նաև ԱԺ փոխխոսնակ Հերմինե Նաղդալյանը: «Որքանով էլ բոլորս ջատագով լինենք թափանցիկությանը, հրապարակայնությանը, այնուամենայնիվ,  հասարակությանը չպետք է թյուր տեղեկատվություն մատուցենք: Պարո'ն Դավիթ Հարությունյան, Դուք էլ քաջ տեղյակ եք, որ,  մեր օրենսդրության համաձայն, այդ ծախսերի քանակական արտահայտությունը գաղտնի չէ: Եկեք` խոսենք ռեալ, արարողակարգային, պետական ծախսերի մեջ գաղտնիություն չկա»,- ասաց նա:

Լրագրողների հետ զրույցում, պատասխանելով yerkir.am-ի հարցին` գուցե իր օբյեկտիվ դիրքորոշումն այդ հարցում դուր չեկա՞վ Հերմինե Նաղդալյանին, Դավիթ Հարությունյանը պատասխանեց. «Ուղղակի, որպեսզի թյուրընկալում չլինի, տիկին Նաղդալյանը փորձեց պարզաբանել»: