Թալինի գործող քաղաքապետը խիստ լարված է. լրագրողները չեն կարողանում զրուցել նրա հետ

 Թալինի գործող քաղաքապետ, քաղաքապետի ՀՀԿ-ական թեկնածու Սարգիս Արամյանը մինչ այս պահը  չի մասնակցել քվեարկությանը: Այս մասին հայտնում է Yerkir.am-ի  թղթակիցը: Մեր լրագրողը նաեւ տեղեկացնում է, որ մինչ այս  պահը ԶԼՄ ներկայացուցիչները  չեն կարողանում կապ հաստատել, զրուցել Արամյանի հետ:

Նրանք անգամ փորձել են Արամյանին  «բռնացնել» ՀՀԿ-ի շտաբում, սակայն ապարդյուն:

 Շտաբում գտնվողները նախ փակել են բոլոր դռները լրագրողների առջեւ, այնուհետեւ նրանցից մեկը հայտարարել է, որ Արամյանը զբաղված է` «իր ընտրությունները կազմակերպելով»:

«Լարվածություն կա իր մոտ, մի ժամից կանցնի»,- հայտարարել է շտաբի անդամը: Այնուհետեւ գործող քաղաքապետի թիմակիցը  Արամյանի լարվածությունը համեմատել է քննությանը պատրաստվող ուսանողի հետ, ով հանգստանում է միայն այն դեպքում, երբ 5 է ստանում:

 Yerkir.am-ի այն դիտարկմանը, թե լրագրողները հանգիստ կարողացել են շփվել մյուս երկու թեկնածուների հետ, բայց  ՀՀԿ-ական թեկնածուի հետ չեն կարողանում, ի վերջո, որտե՞ղ է Արամյանը, վերջինիս կուսակիցը հայտարարել է. «Ինքը ամեն տեղ էլ կա»:

Նշենք, նաեւ, որ լրագրողների երկար համառելուց հետո շտաբի դուռը բացել են. Արամյանն այնտեղ չէր, սակայն այնտեղ էր Արագածոտնի նախկին մարզպետ Սարգիս Սահակյանը, ով եւ համակագում է աշխատանքները: