Այսօրվա ցուրտն էլ եթե նկատի ունենաք, ծիրանի մասին խոսելն ավելորդ է. Արմավիրի մարզպետ

Վերջին օրերին և հատկապես` անցած գիշեր հանրապետության տարածքում գրանցված ցածր ջերմաստիճանը լուրջ վնասներ է հասցրել Արմավիրի մարզին: Այս մասին Yerkir.am-ին հայտնեց Արմավիրի մարզպետ Աշոտ Ղահրամանյանը: Նրա խոսքով` վնասվել է հիմնականում ծիրանենին, մնացած մրգատեսակների հետ  կապված էլ կա լուրջ խնդիր:  

«Եթե կեռասը և դեղձը ծաղկեն, այդ ժամանակ նոր կերևա` ինչ չափի է ցրտահարությունը: Այսօր բողբոջները բացված չեն, դեռ չգիտենք` ինչ չափով են վնասվել, ցրտահարվել: Նախորդ օրերին էլ  ցրտահարություններ են եղել, այս գիշեր էլ ավելացան ցրտահարությունները»,- ասաց մարզպետը:

Նա հայտնեց նաև, որ վնասի չափերը դեռևս ճշտված չեն, բայց, մոտավոր հաշվարկներով, ծիրանենու ցրտահարությունը կազմում է 70 տոկոս: «Պայմանականորեն կարող եմ ասել 70 տոկոս, բայց վաղը կարող է դառնալ 90 տոկոս: Նախորդ օրերի ցուրտն էլ նկատի ունենալով`  կարող եմ ասել, որ ծիրանենու 70-ից ավելի տոկոսը վնասվել է,  այսօրվա մասին էլ չենք կարող խոսել, եթե այսօրվանն էլ նկատի ունենաք,  ծիրանի մասին խոսել ավելորդ է»,- ասաց նա:

Նշենք, որ գյուղատնտեսության նախարարությունից տեղեկացանք, որ դեռևս ճշտվում են այս գիշեր գրանցված ցրտի` ծառատեսակներին հասցրած վնասի չափերը: