Վարկը սակագնի վրա որևէ ազդեցություն չի ունենալու. Ռոբերտ Նազարյան

Հանրային ծառայությունները կարգավորող հանձնաժողովի նախագահ Ռոբերտ Նազարյանն այսօր խորհրդարանում լրագրողներին ասաց, որ հանրությունը սխալ է ընկալում ՀԷՑ-ի համար վարկ վերցնելու տրամաբանությունը:

«Էներգետիկայի նախարարության վեբկայքում հստակ գրված է, որ ՀԷՑ-ը չի վերցնում այս վարկը, սա ատոմակայանին ու ՋԷԿ-ին է տրամադրվում: Սա որևէ ձևով սակագնի հետ չի առնչվում»,- ասաց նա:

Պնդմանը, որ էներգետիկայի և բնական պաշարների նախարարության և ՀԷՑ-ի հայտարարությունները հակասում են միմյանց, քանի որ նախարարությունը հայտարարում է, որ իրենք հետագայում վարկի տոկոսները վերցնելու են հենց ՀԷՑ-ից, սակայն ՀԷՑ-ն էլ շեշտում է, թե ֆինանսական առողջացման նպատակով չի ներգրավել և չի նախատեսում ներգրավել որևէ վարկային միջոց պետության կողմից: Հարցին, թե հիմա ո՞ր կառույցն է ստում, Նազարյանը պատասխանեց. «Ես իմ ասածների պատասխանատուն եմ, և այդ վարկային միջոցները, որոնք ներառվելու են Համաշխարհային բանկի կողմից` նշված որոշումով, ես միանշանակ հայտարարում եմ, որ սակագնի վրա ոչ մի ազդեցություն չեն ունենալու»:

Նշենք նաև, որ այսօր ԱԺ-ում Ռոբերտ Նազարյանը, պատասխանելով ՀԱԿ պատգամավոր Արամ Մանուկյանի հարցին, թե այս տարվա օգոստոսին սակագնի վերանայում կլինի՞, ասել էր, որ այս տարվա օգոստոսի 1-ին 23,4 միլիարդ դրամը սակագնից դուրս է գալու: Դիտարկմանը, թե այս ծախսերը փակելու դեպքում սակագինը կնվազի՞, նա արձագանքեց. «Ես ասում եմ, որ դա դուրս կգա, բայց միայն մի գործոնով դժվար է գնահատել: Սպասեք մի քանի ամիս, էլեկտրաէներգետիկական հաշվեկշիռ կունենանք, դրամ-դոլար փոխարժեքի հարաբերակցություն կունենանք, սահմանի վրա գազի գնի վերջնական մեծությունը կունենանք, և որոշում կկայացվի: Սակագինը միագործոն չէ, այլ բազմագործոն է»: