Անկարան Սիրիայում հրադադարի մասին բանակցությունների հարցում լավատես չէ. Դավութօղլու

Թուրքիայի վարչապետ Ահմեդ Դավութօղլուն Al Jazeera-ի հետ զրույցում հայտնել է, որ եթե Սիրիայում տարածքների մի մասը Ասադի իշխանության տակ չէ, դա միայն Թուրքիայի շնորհիվ է:

Ըստ Milliyet-ի՝ նշելով, որ իրենք շարունակելու են աջակցել սիրիական ընդդիմությանը, Դավութօղլուն ասել է, որ «Թուրքիայի աջակցության շնորհիվ է, որ Սիրիայի զինյալները կարողանում են դիմադրել ՌԴ-ի, Իրանի և «Հըզբոլլահ»-ի ճնշումներին»։

Թուրքիայի վարչապետը հայտնել է, որ Սիրիայից Թուրքիային վտանգի սպառնալիքի դեպքում իրենք «ոչ մեկից թույլտվություն և օգնություն չեն սպասի և կանեն այն, ինչ հարկավոր է»:

Անդրադառնալով ՌԴ-ի հետ հարաբերություններին՝ Դավութօղլուն նշել է, որ  հարաբերությունների կարգավորումը ռուսների ձեռքին է, և միաժամանակ ՌԴ-ին մեղադրել է Սիրիայում բռնություններ իրականացնելու մեջ:

Սիրիայում հրադադարի հաստատման վերաբերյալ փետրվարի 25-ին Ժնևում կայանալիք բանակցություններին անդրադառնալով՝ նա նշել է, որ այդ հարցում Անկարան «այնքան էլ լավատես չէ»: