Հարկ եղած դեպքում Սիրիայում ցամաքային գործողություն կսկսենք. Դավութօղլու

Թուրքիայի վարչապետ Ահմեդ Դավութօղլուն Al Jazeera-ի հետ զրույցում հայտարարել է, որ հարկ եղած դեպքում կարող են ցամաքային գործողություններ սկսել Սիրիայում:

«Թեև Թուրքիան նախընտրում է միջազգային կոնսենսուսը, սակայն հարկ եղած դեպքում միայնակ կարող է ցամաքային գործողություններ սկսել Սիրիայում»,- ասել է Թուրքիայի վարչապետը:

Նրա խոսքով` թե' ինքնապաշտպանության, թե' ԻՊ-ի և այլ ահաբեկչական խմբավորումների դեմ պայքարի տեսանկյունից կայացված որոշումները Թուրքիայի լեգիտիմությունն են ապահովում:

Դավութօղլուն անդրադարձել է նաև Սիրիայի տարածքից արձակված հրթիռների` Թուրքիայում ընկնելու միջադեպերին: Հարցին, թե դրանք կազդե՞ն Սիրիայի հարցում քաղաքականության փոփոխության վրա, նա պատասխանել է. «Ոչ: Մեր քաղաքականությունը միշտ էլ պարզ է եղել: Ինչ վերաբերում է ԻՊ-ին, քանի դեռ նրանք շարունակում են Քիլիսի ուղղությամբ հրթիռներ արձակել, շարունակելու ենք նրանց թիրախ դարձնել: Իրականում ոչ մի երկիր ԻՊ-ի դեմ Թուրքիային հավասար չի պայքարել: Մենք չենք ցանկանում, որ ԻՊ-ը մեր սահմանին լինի»: