Վարդգես Գասպարիի կալանքը բացառապես իրավական շրջանակներում է. Շարմազանով

Այսօր ԱԺ քառօրյա նիստում մի քանի պատգամավորներ բարձրացրեցին ակտիվիստ Վարդգես Գասպարիի կալանավորման հարցը: ԱԺ փոխխոսնակ Էդուարդ Շարմազանովը հայտարարեց, որ, օգտվելով ժամանակակից տեխնոլոգիաների հնարավորություններից, կարողացել է որոշ մանրամասներ ճշտել Գասպարիի վերաբերյալ: Նա հայտարարեց, որ, իր ունեցած տեղեկությունների համաձայն, Վարդգես Գասպարին այս պահին դրությամբ թե\' գրավոր, թե\' բանավոր կերպով իր առողջական խնդիրների մասին չի դիմել ոչ մեկի, իսկ նրա կալանավորումը տեղի է ունեցել բացառապես օրենքի շրջանակներում:

«Համապատասխան իրավապահ մարմինները հստակ նշում են, որ որեւէ քաղաքական ենթատեքստ չկա, եւ միայն փոխվել է Գասպարիի խափանման միջոցը: Նա տվել է ստորագրություն քաղաքից չհեռանալու մասին եւ բազմաթիվ անգամներ խախտել է այն: Իսկ եթե կա ստորագրություն չհեռանալու մասին, ապա դա խախտելու դեպքում այն կարող է փոխվել խափանման այլ միջոցով: Նրա կալանքը բացառապես իրավական շրջանակներում է տեղի ունեցել, եւ ասել, թե դա քաղաքական դրդապատճառներով է պայմանավորված, տեղին չէ»,- ասաց Շարմազանովը: