Իմ խնդրանքն է՝ նույն ոգով գործել ընտրության օրը՝ մնալով բացառապես օրենքի շրջանակներում․ նախկին փոխվարչապետ

Արմեն Գևորգյանը տելեգրամյան իր ալիքում գրում է․

Քարոզարշավի վերջին րոպեներին ուզում եմ իմ անկեղծ շնորհակալական խոսքն ուղղել «Հայաստան» դաշինքի բոլոր կառույցներին, համակիրներին, մեր հազարավոր կամավորներին, մարդկանց, որոնք գիշեր-ցերեկ, ընդհանուր շահի գիտակցմամբ աշխատել են այս ողջ ընթացքում։ Սա կազմակերպվածության և պատասխանատվության բացառիկ օրինակ էր, որտեղ կար թե´ անհատական, թե´ թիմային մեծ աշխատանք։

Իմ խնդրանքն է՝ նույն ոգով գործել ընտրության օրը՝ մնալով բացառապես օրենքի շրջանակներում, չտրվելով որևէ սադրանքի և վերջնարդյունքում արձանագրենք մեր վստահ հաղթանակը։ Հաղթանակ, որը լինելու է բոլորինս, և որից շահելու են երկրի բոլոր քաղաքացիները, անգամ նրանք, ովքեր այս ընտրություններին իրենց քվեն տան այլ քաղաքական ուժի։ Սա լինելու է ոչ թե «Հայաստանի», այլ՝ Հայաստանի հաղթանակը։

Մի կարևոր դիտարկում ևս. եթե մենք կարողանանք նման անձնուրաց մարդկանցով, պատասխանատվության և աշխատասիրության նման բարձր հատկանիշներով օժտված անձանցով առաջիկայում համալրել պետական համակարգը և կարևոր օղակները, մեր երկիրը մեծապես կշահի։

Ամեն ինչ լավ է լինելու։