Շավարշ Քոչարյանը քչախոս էր

Այսօր կառավարության նիստից հետո ԱԳ փոխնախարար Շավարշ Քոչարյանը չցանկացավ պատասխանել լրագրողների հարցերին, որոնք հիմնականում վերաբերում էին ԵԽԽՎ-ում հակահայ զեկույցների քննարկմանն ու քվեարկությանը:

Լրագրողների հարցին, թե ինչպե՞ս է գնահատում ԵԽԽՎ այդ նիստը, Շավարշ Քոչարյանը պատասխանեց. «Բավարար»:

Հարցին, թե ինչո՞ւ ԵԽԽՎ այդ աղմկահարույց նիստից հետո ՀՀ ԱԳՆ-ն հանդես չեկավ պաշտոնական հայտարարությամբ, նա հակառակը պնդեց. «ԱԳՆ-ն հայտարարություններ արել է, անձամբ ես իմ միկրոբլոգում գրառում եմ կատարել»:

Հիշեցնենք, որ ԵԽԽՎ հիշյալ նիստի օրը Շավարշ Քոչարյանն իսկապես իր թվիթերյան միկրոբլոգում գրառում էր կատարել` ասելով. «ԵԽԽՎ Սարսանգի ջրամբարի բանաձևը ջուր է լցում ադրբեջանական քարոզչական ջրաղացին, որի նպատակն է ԼՂ խաղաղ բանակցային գործընթացի տապալումը»:

Փաստորեն, կա\'մ Շավարշ Քոչարյանի թվիթերյան միկրոբլոգն ունի հսկայական թվով ՀՀ քաղաքացի հետևորդներ, կա\'մ էլ Շավարշ Քոչարյանի միկրոբլոգի գրառումները պետք է նույնացնել ԱԳՆ պաշտոնական հաղորդագրությունների հետ: