Լուրջ մտահոգվելու առիթ չկա. Շավարշ Քոչարյանը՝ Թրամփի ընտրվելու մասին

Այսօր` կառավարության նիստից հետո, ԱԳ փոխնախարար  Շավարշ Քոչարյանն անդրադարձել է ԱՄՆ նախագահի պաշտոնում Դոնալդ Թրամփի ընտրության ազդեցությանը մեր տարածաշրջանի վրա: Նրա խոսքով`  պետք է սպասել, հետևել, թե ինչ արտաքին քաղաքականություն կորդեգրի Սպիտակ տան նոր ղեկավարը:

«Համենայն դեպս, ես չեմ կարծում, որ լուրջ մտահոգվելու տեղ կա, բայց աշխատելու տեղ միշտ էլ կա»,- ասաց Քոչարյանը:

Հարցին, թե արդյո՞ք ԼՂ հակամարտության մասին Թրամպի տեղեկացված չլինելը  մտահոգիչ չէ,  ԱԳ փոխնախարարը պատասխանեց. «Դա խնդիր չէ: Պարտադիր չէ, որ աշխարհի ամեն մի մասում տեղի ունեցած իրադարձությունների մասին թեկնածուն ունենա լիակատար պատկերացում: Բնական է, որ երբ լինի կարիք, նա կունենա այդ ամբողջ տեղեկատվությունը»:

Ինչ վերաբերում է Ադրբեջանում սպասվող լայնամասշտաբ զորավարժություններին, Քոչարյանը հայտարարեց, որ Վիեննայի հանդիպումներից հետո ձեռք բերված պայմանավորվածությունների արդյունքում նման զորավարժություններից 40 օր առաջ կողմերը պարտավոր են հայտարարություն անել, ինչը, սակայն,  Ադրբեջանը չի արել: «Սա կրկին խոսում է նրա մասին, որ Բաքուն կրկին շարունակում է տորպեդահարել Վիեննայի համաձայնությունները կյանքի կոչելը»,- ասաց փոխնախարարը: