Թուրքիայի քաղաքականությունը հանգեցրեց այդ քայլին. Շավարշ Քոչարյանը` Սերժ Սարգսյանի` ՄԱԿ-ում ելույթի մասին

Այսօրվա Թուրքիան բռնապետական ճանապարհով է գնում, ժխտողական քաղաքականություն է որդեգրել, և Թուրքիայի` հենց այդ պահվածքը հանգեցրեց նրան, որ ՄԱԿ-ում ՀՀ նախագահն անդրադառնա Ցյուրիխյան արձանագրություններից հրաժարվելուն: Այս մասին Հայաստան-Սփյուռք համահայկական համաժողովի ժամանակ ասաց ՀՀ ԱԳ փոխնախարար Շավարշ Քոչարյանը: Ըստ նրա` ժողովրդավարական ճանապարհով գնալու փոխարեն Թուրքիան ավելի ու ավելի է գնում բռնապետության ճանապարհով:

«Այդ բոլորը հանգեցրեց նրան, որ ՀՀ նախագահ Սերժ Սարգսյանը ՄԱԿ-ի ամբիոնից հայտարարեց, որ թող չմտածեն` մենք այդ պայմաններում կարող ենք պատանդ մնալ: Այդ արձանագրությունները հայտարարվելու են առ ոչինչ, ու մենք 2018 թվականի գարուն ենք մտնելու առանց այդ արձանագրությունների», - ասաց Շավարշ Քոչարյանը:

Նա նշեց նաև, որ այս ամենի արդյունքում բոլորս տեսնում ենք, որ ինչքան կարևոր է պայքարը ժխտողականության դեմ: