Չի կարելի այդքան անլրջացնել ամեն ինչ. Շարմազանով

Ազգային ժողովի փոխնախագահ Էդուարդ Շարմազանովը համաձայն չէ, թե իշխանություններին չի հաջողվել իրականացնել լեգիտիմ ու դրական հանրաքվե: Ազգային ժողովում լրագրողների հետ զրույցում նա, անդրադառնալով ԱԺ ՀԱԿ խմբակցության ղեկավար Լևոն Զուրաբյանի հայտարարությանը, թե հանրաքվեին 485 հազար ձայն կեղծվել է, նշեց, որ պետք չէ ամեն ինչ անլրջացնել:

«Ես այն կարծիքին չեմ, որ խախտումներ ընդհանրապես չեն եղել: Սակայն, հարցնում եմ՝ ինչո՞ւ ընդդիմությանը չի հաջողվել փաստարկներ ներկայացնել: Ես ևս մեկ անգամ ասում եմ՝ ասելով չի, չի կարելի այդքան անլրջացնել ամեն ինչ: Հայաստանում, նույնիսկ` Տեր-Պետրոսյանի կառավարման տարիներին, երբ ասում էին պոլի փայտ լինի, բայց ՀՀՇ-ից լինի, երբ կարևոր էր ոչ թե ով է ընտրում, այլ ինչպես են հաշվում, հնարավոր չէր 500 հազար ձայն կեղծել: Դա անլուրջ է, ես չեմ ցանկանում այդ անլուրջ հայտարարության վրա այդքան ծանրանանք: Կա՞ն փաստեր, եթե կան թող ներկայացնեն: Ես փաստեր չեմ տեսել և կարծում եմ` հանրությունն էլ չի տեսել»,- հայտարարեց Շարմազանովը:

ԱԺ փոխնախագահը նշեց նաև, որ խախտումների մասին բոլոր հաղորդումներին ՀՀ գլխավոր դատախազությունը և ոստիկանությունը պատշաճ կերպով արձագանքել են: «Դուք տեսաք, որ ողջ քարոզչության ընթացքում, քվեարկության ընթացքում և դրանից հետո իրավապահ մարմինների ուշադրության կենտրոնում էին ոչ միայն ընդդիմության ներկայացուցիչների, այլ նաև լրագրողների նյութերը»,- ընդգծեց նա` հավելելով, որ սահմանադրական բարեփոխումների հանրաքվեի ընթացքում երևացել է հասարակության կամքը:

«Բոլոր խախտումներով հանդերձ` մենք պետք է արձանագրենք, որ այս հանրաքվեն համապատասխանում էր Հայաստանի ստանձնած պարտավորություններին: Իսկ եթե որևէ մեկն ունի տվյալներ խախտումների մասին, պետք է ներկայացնի փաստեր: Եթե նույնիսկ մի պահ մենք ընդունենք, որ եղել են այդ խախտումները, դրանք չեն կարող ազդել արդյունքների վրա»,- հավելեց ԱԺ փոխնախագահը:

Նա նաև շեշտեց, որ հանրությունը կասկածներ չունի հանրաքվեի արդյունքների վերաբերյալ: Ըստ Շարմազանովի` հանրաքվեի ընթացքում գուցե եղել են խախտումներ, սակայն արդյունքների հետ կապված մտահոգություններ չկան: