Նրանք միայն ուժի լեզվով են ուզում խոսել մեզ հետ. Սեյրան Օհանյանը՝ սահմանային լարվածության խորացման մասին

Այսօր կառավարության հետ հարցուպատասխանի ժամանակ «Ժառանգություն» խմբակցության պատգամավոր Թևան Պողոսյանը հարց ուղղեց պաշտպանության նախարար Սեյրան Օհանյանին առաջնագծում ստեղծված լարվածության մասին: Թևան Պողոսյանը շեշտեց` ունենք զոհ, և առաջին անգամ ադրբեջանցիները սկսել են կրակել տանկերից:

Սեյրան Օհանյանը նշեց, որ իրադրությունը սահմանին մնում է լարված, վերջին օրերին, մասնավորապես` հանրաքվեի նախօրեին, նաև ընթացքում և արդեն հիմա լարվածությունը հասել է գագաթնակետին. ադրբեջանցիները կրակում են ոչ միայն հրազենից, այլ նաև տարբեր տրամաչափի ականանետներից, իսկ այսօր արդեն՝ տանկերից:

Պաշտպանության նախարարը կարծիք հայտնեց, որ ադրբեջանական ղեկավարությունը շարունակում է իր անտրամաբանական քաղաքականությամբ իրավիճակը տանել դեպի ապակայունացում` փորձելով բանակցային գործընթացը տանել փակուղի և Հայաստանի ու Արցախի հետ խոսել ուժի տեսնակյունից: Սեյրան Օհանյանը չբացառեց, որ ադրբեջանական ռազմական ղեկավարությունը փորձում է սրել իրավիճակը` ունենալով իր հաշվարկները Մերձավոր Արևելքում ստեղծված աշխարհաքաղաքական զարգացումներից:

«Մեր ենթակա հրամանատարները լուրջ պաշտպանողական ու կանխարգելիչ միջոցառումներ են իրականցնում, և նրանց անձնուրաց աշխատանքի շնորհիվ է, որ կարողանում ենք պահպանել հարաբերական կայունությունը: Մեր հարևանները միայն ուժի լեզվով են ուզում խոսել մեզ հետ: Հայկական բանակն իր առջև դրված խնդիրները պատշաճ կերպով իրականացնում է»,- ասաց Սեյրան Օհանյանը: