Լավ կլիներ՝ Րաֆֆին այլ բաներով զբաղվեր. Սեյրան Օհանյան

ՀՀ պաշտպանության նախարար Սեյրան Օհանյանն այսօր խորհրդարանում լրագրողների հետ զրույցում անդրադարձավ «Ժառանգություն» կուսակցության ղեկավար Րաֆֆի Հովհաննիսյանի` իր հրաժարականի պահանջին:

Օհանյանի խոսքով` լավ կլիներ, որ Րաֆֆին` որպես քաղաքական գործիչ, այլ բաներով զբաղվեր: «Ես չգիտեմ` ինչ նպատակներ ունի: Ուզում եմ ասել հետևյալը` հրաժարական պահանջել յուրաքանչյուր ոք կարող է, բայց ես չեմ կարող հրաժարվել հայրենիքին ծառայելուց»,- ասաց պաշտպանության նախարարը:

Դիտարկմանը, թե կարծիք կա, որ հենց ինքն է լինելու ՀՀ ապագա նախագահը, նախարարը պատասխանեց. «Այսօր ես իմ դերն իրականացնում եմ` որպես պաշտպանության նախարար: Ես չեմ դադարելու ծառայել հայրենիքին: Թողեք` ես ինքս տնօրինեմ իմ ճակատագիրը»: