Ժողովրդին չանհանգստացնեն էս խառնաշփոթ բաներով. Տիգրան Արզաքանցյան

Սերժ Սարգսյանի երդման արարողությանը ներկա էր նաեւ նախկին պատգամավոր Տիգրան Արզաքանցյանը: Yerkir.am-ի թղթակիցը հետաքրքրվել է, թե հատուկ երդման արարողությանը մասնակցելու համա՞ր է ՌԴ-ից եկել Հայաստան:

«Հատուկ ոնց կարամ ասեմ: Ես մի քիչ շուտ եմ եկել, հա'մ գործերովս, հա'մ էլ լավ միջոցառում ա, կմասնակցենք»,- նշեց Արզաքանցյանը եւ հայտարարեց, որ վերընտրված նախագահը ոչ թե խոսքով, այլ գործով պետք է ցույց տա իր անելիքները:

Արզաքանցյանը համամիտ է, որ երկրում կա դժգոհություն, բայց, մյուս կողմից, շտապում է վստահեցնել, որ այն, ինչ կատարվում է, ազատ խոսքի դրսեւորում է, դեմոկրատիա, իսկ դժգոհություն բոլոր երկրներում էլ կա: Դիտարկմանը, թե ստացվում է, այն, ինչ կատարվում է Ազատության հրապարակում, նորմալ է, Արզաքանցյանը հայտարարեց` այո:

Նախկին պատգամավորի կարծիքով` իշխանությունները եւ Րաֆֆի Հովհաննիսյանը պետք է համաձայնության գան, նստեն մեկ սեղանի շուրջ ու «մեր ժողովրդին չանհանգստացնեն էս խառնաշփոթ բաներով»: