Իսկ Մարտի 1-ից հետո ՀԱԿ-ը կարողացավ նստել ՀՀԿ-ի հետ. Նիկոլ Փաշինյան

Այսօր ԱԺ քառօրյա նիստերը բոյկոտեցին ՀԱԿ խմբակցության երեք պատգամավորներ` Լևոն Զուրաբյանը, Գագիկ Ջհանգիրյանն ու Արամ Մանուկյանը: Սակայն Նիկոլ Փաշինյանը չմիացավ այդ բոյկոտին;

Լրագրողների հետ զրույցում նա նշեց, որ չի միացել բոյկոտի որոշմանը, որովհետև այն կայացրել էր ոչ թե խմբակցությունը, այլ «Հայ ազգային կոնգրես» կուսակցությունը: Փաշինյանը հավելեց, որ ինքը պարտավոր չէ կատարել այլոց որոշումները, որոնց կայացմանն անձամբ չի մասնակցել:

Փաշինյանը նաև նշեց, որ խմբակցության անդամները, որոնք այսօր բոյկոտել են նիստը, պատճառաբանելով, թե չեն կարող հանրաքվեն կեղծողների հետ մեկ դահլիճում նստել, 2008թ. մարտի 1-ից հետո, փաստորեն, կարողացան գտնվել նրանց հետ ԱԺ նույն նիստերի դահլիճում և ավելին՝ մեկ րոպե լռությամբ հարգել տասը զոհի հիշատակը: «Իսկ հիմա հանկարծ չեն կարող կեղծված հանրաքվեից հետո ՀՀԿ-ականների հետ միասին լինել միևնույն դահլիճում»,- ասաց պատգամավորը: