Թուրքիան մեջտեղ կբերի «Ղարաբաղի խաղաքարտը», ուստի Հայաստանը պիտի միշտ պատրաստ պահի իր զինուժը. Zaman

Թուրքական ընդդիմադիր Zaman պարբերականի թղթակից Ալդա Էնգոիանն անդրադարձել է ռուս-թուրքական լարված հարաբերությունների հնարավոր ազդեցությանը Հարավային Կովկասի երկրների վրա: Թերթի կայքում տեղ գտած հոդվածում հեղինակն ընդգծում է. «Ռուսաստանի և Թուրքիայի միջև բախումների պատմական թատերաբեմ հանդիսացող Հայաստանը, Վրաստանն ու Ադրբեջանը անսպասելիորեն հայտնվել են շատ խառը իրավիճակում, երբ ցանկացած տեսակի քաղաքական նախաձեռնություն կարող է շատ ծանր հետևանքներ ունենալ». տեղեկացնում է Ermenihaber-ը:

Էնգոիանը հիշեցնում է, որ թուրքական օդուժի կողմից ռուսական ռազմական ինքնաթիռի խոցումից հետո կողմերը ոչ մի կերպ հաշտության եզրեր չեն կարողանում գտնել, ավելին՝  Դաշնային խորհրդի առջև տարեկան ելույթում Վլադիմիր Պուտինը հայտարարել է, որ առաջիկայում Էրդողանի հետ որևէ փոխհամաձայնություն չի կարող կնքվել:

Zaman-ի թղթակիցը մեջբերում է Голос Армении թերթում արտահայտված  այն տեսակետը, որ թեև ռուս-թուրքական պատերազմ, ամենայն հավանականությամբ, չի սկսվի, բայց «այս ողջ լարվածությունն ուղղակիորեն ազդեցություն կունենա նաև Հայաստանի վրա»:

Ներկայացված տեսակետի համաձայն՝ Թուրքիայի մասնատումը, եթե անգամ այսօր արդիական չէ, բայց «առաջիկա 20 տարվա ընթացքում Թուրքիայի քարտեզը կարող է փոխվել»: Եվ այդ դեպքում Թուրքիան չի հապաղի մեջտեղ բերել «Լեռնային Ղարաբաղի խաղաքարտը»: Հետևաբար, Հայաստանը պիտի միշտ պատրաստ վիճակում պահի իր զինուժը:

Հեղինակը կարծիք է հայտնում, որ ռուս-թուրքական հարաբերությունների լարվածությունը դժվար կացության մեջ է դրել նաև Ադրբեջանին, քանի որ, նավթային բիզնեսի առումով, ինչպես նաև թվացյալ կայունության ապահովման նպատակով հարկադրված է լավ հարաբերությունների մեջ լինել և\' Թուրքիայի, և\' Ռուսաստանի հետ:

«Եթե Ադրբեջանը ագրեսիվ թուրքամետ դիրք ընդունի, ապա ստիպված կլինի դեմ դուրս գալ նաև Սիրիայի հարցում Ռուսաստանի դաշնակիցը հանդիսացող Իրանին»,- գրում է լրագրողը:

Իսկ Վրաստանը Թուրքիայի դաշնակիցն է: Ռուս-վրացական հարաբերությունները երկար ժամանակ սառն են: Ինչպես վրացական  Sakartvelo Mspolio թերթն է գրում. «Բախման թատերաբեմը կարող են լինել հենց վրացական հողերը»:

«Վրաստանը կարող է ավելի ծանր դրության մեջ հայտնվել, եթե Թուրքիան փակի սևծովյան նեղուցները, և Ռուսաստանը Վրաստանից պահանջի միջանցք տրամադրել՝ Սիրիա հասնելու համար»,- գրում է Էնգոիանը՝ հավելելով, որ Վրաստանը, ի վերջո, ստիպված կլինի հստակ կողմնորոշվել, թե կողմերից որին է աջակցում: