Սպիտակի ողբերգական երկրաշարժից անցել է 27 տարի

1988 թվականի այս օրը՝ դեկտեմբերի 7-ին` ժամը 11:41-ին, Հայաստանում 10 բալ ուժգնությամբ ավերիչ երկրաշարժ տեղի ունեցավ, որի էպիկենտրոնը Սպիտակ քաղաքի մոտ գտնվող Շիրակամուտ գյուղում էր:

Ընդամենը 30 վայրկյանի ընթացքում քանդվեց Սպիտակ քաղաքը և լուրջ ավերածություններ եղան հարակից քաղաքներում` Լենինականում (ներկայիս Գյումրի) և Կիրովականում (Վանաձոր):  Լենինականում, որն ուներ 300 հազար բնակիչ, շինությունների 80 տոկոսն ավերվեց:

Համաձայն պաշտոնական տվյալների` ավերիչ երկրաշարժի հետրանքով զոհվեց 25 հազար մարդ, 19 հազարը վիրավոր էր, 9 հազար մարդ հաշմանդամ  դարձավ: Որոշ տվյալներով` 514.000 բնակիչ մնացել էր անօթևան: Բացի այդ` երկրաշարժը ոչնչացրել էր Հայաստանի ենթակառուցվածքների 40 տոկոսը:

Ցավոք, երկրաշարժից 27 տարի անց էլ դեռ չի վերացել «աղետի գոտի» հասկացությունը. բազմաթիվ ընտանիքներ դեռևս բնակվում են ժամանակավոր տնակներում: