Ինչո՞ւ Հայաստանը չունի ազգային ավիափոխադրող

Ներկայումս Հայաստանում չկա մի ավիաընկերություն, որը կարող է ազգային ավիափոխադրող դառնալ: Այս կարծիքին է ԼՂՀ ԿԱ քաղաքացիական ավիացիայի վարչության պետ Դմիտրի Ադբաշյանը: Ըստ նրա՝ ազգային ավիափոխադրող չունենալու պատճառներից մեկն այն է, որ Հայաստանը մինչև հիմա չունի օդային օրենսգիրք:

«Այսօր փոխադրումների հետ կապված ողջ պատասխանատվությունն ընկնում է ավիաընկերությունների վրա: Ռուսական օդանավի կործանման դեպքը՝ վառ օրինակ. ՌԴ տրանսպորտի նախարարը հանգիստ խոսում էր, իսկ թռիչքն իրականացրած ավիաընկերության ղեկավարը խառնվել էր իրար: Դրա համար էլ մեզ մոտ խուսափում են պատասխանատվության տակ ընկնելուց»,- լրագրողների հետ հանդիպման ժամանակ ասաց Ադբաշյանը:

Խոսելով ՀՀ-ի վերջին խոշոր ավիափոխադրողի՝ «Արմավիա»-ի մասին, ԽՍՀՄ վաստակավոր օդաչուն ասաց. «Ես ուսումնասիրել եմ «Արմավիա»-ի օդանավերի սև արկղերը և պարզել, որ գրեթե ամեն թռիչքի ժամանակ 2 տոննայից ավելի չհայտարարագրված բեռ են տեղափոխել: «Արմավիա»-ն կատաստրոֆիկ վիճակում էր, եթե այն չլուծարվեր, հնարավոր է Սոչիի նման երկրորդ ավիաաղետը լիներ»,- ասաց նա: