Էրեբունիում մահափորձի ենթարկված 4 երիտասարդներից 2-ը դուրս են գրվել

Հոկտեմբերի 25-ի երեկոյան Էրեբունիում կրակոցներից տուժած 4 երիտասարդներից երկուսը դուրս են գրվել 1-ին համալսարանական հիվանդանոցից: Այս մասին yerkir.am-ին հայտնեցին հիվանդանոցի վիրաբուժական բաժանմունքից:

Տուժածներից  ծանր է 27-ամյա Վահագն Գեւորգյանի վիճակը, ով «որովայնի խոռոչի թափանցող հրազենային վնասվածք, ներքին արյունահոսություն» ախտորոշմամբ տեղափոխվել էր «Էրեբունի» ԲԿ: Նա դեռևս գտնվում է վերակենդանացման բաժանմունքում:

Հիշեցնենք, որ հոկտեմբերի 25-ին և լույս 26-ի գիշերը հրազենային վնասվածքներով բժշկական կենտրոն է տեղափոխվել 4 անձ՝ Վ.Գևորգյանը, Ա.Սրապիոնյանը, Ա.Ավագյանը և Վլ.Գևորգյանը։ Քննությամբ պարզվել է, որ նրանց հրազենային վնասվածքներն ստացել են հոկտեմբերի 25-ի ուշ երեկոյան՝ բուքմեյքերական գրասենյակում։

Դեպքի կապակցությամբ հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի 1-ին, 6-րդ, 7-րդ եւ 235-րդ հոդվածի 1-ին մասի հատկանիշներով: Քննությամբ պարզվել է բուքմեյքերական գրասենյակ մուտք գործած զինված անձանցից 2-ի ինքնությունը։ Նախաքննությամբ ձեռք բերված ապացույցների հիման վրա՝ քննիչը հոկտեմբերի 28-ին որոշում է կայացրել 2 անձի ՀՀ քրեական օրենսգրքի 34-104-րդ հոդվածի 2-րդ մասի 1-ին, 6-րդ և 7-րդ կետերով, 235-րդ հոդվածի 1-ին մասով որպես մեղադրյալ ներգրավելու մասին։ Նույն օրը քննիչը միջնորդություն է ներկայացրել դատարան՝ նրանց նկատմամբ, որպես խափանման միջոց, կալանավորում կիրառելու և հետախուզում հայտարարելու վերաբերյալ։