Նուբարաշենում վթարի ենթարկված երթուղայինի տուժած ուղևորները դուրս են գրվել հիվանդանոցից

Այսօր առավոտյան Նուբարաշենում 47 համարի երթուղայինի վթարի հետևանքով «Էրեբունի» ԲԿ տեղափոխված 3 տուժածներն արդեն դուրս են գրվել: Այս մասին Yerkir.am-ին հայտնեցին «Էրեբունի» ԲԿ-ից: Տուժածներից մեկի մոտ ախտորոշվել է այտոսկրի կոտրվածք, մյուսներն էլ ստացել են ոչ լուրջ վնասվածքներ:

«Համապատասխան բուժօգնությունից հետո տուժածները դուրս են գրվել»,- հայտնեցին հիվանդանոցից:

Հիշեցնենք, որ այսօր` ժամը 10.27-ին, ահազանգ է ստավել, որ Երևանի Նուբարաշենի աղբանոցից դեպի գերեզմաններ տանող հատվածում տեղի է ունեցել ՃՏՊ, կան տուժածներ: Պարզվել է, որ բախվել են թիվ 47 երթուղին սպասարկող «ԳԱԶել» մակնիշի 2601Տ պ/հ (վարորդ` 1974 թ. ծնված Մ. Ա.) և «ԶԻԼ 131» մակնիշի 517 LP 61 պ/հ (վարորդ` 1958 թ. ծնված Դ. Ս.) ավտոմեքենաները:

Մինչ փրկարարների` կանչի վայր հասնելը «ԳԱԶել» մակնիշի ավտոմեքենան հոսանքազրկել են տեղի ուժերով և փակել գազի բալոնի փականը: Ուղևորներ` 1984 թ. ծնված Ա. Զ.-ը, 1987 թ. ծնված Զ. Վ.-ը և 1970 թ, ծնված Կ. Վ.-ը հոսպիտալացվել են «Էրեբունի» ԲԿ, որտեղ նրանց առողջական վիճակը գնահատվել է միջին ծանրության: