Վթարի ենթարկված 7 երիտասարդներից մեկը հայր պետք է դառնար. Տաշիրում սգո օր է հայտարարվել

Լոռիում 7 երիտասարդների կյանք խլած ողբերգական վթարը ցնցել է բոլորին, հատկապես` Տաշիր քաղաքի բնակիչներին: Հիշեցնենք, որ մահացածներից 5-ը Տաշիրի բնակիչներ էին:

Զոհված երիտասարդների հարազատները yerkir.am-ին հայտնեցին, որ Տաշիրում արդեն սգո օր է հայտարարվել: Սոցիալական ցանցի էջերում տաշիրցիներն արդեն սև լուսանկարներ են տարածում՝ «Սգո օր Տաշիր քաղաքում» գրառմամբ:

Նշենք, որ մեքենայի ղեկին եղել է 21-ամյա Վանիկ Մարդոյանը: Նա Երևանի պետական ճարտարագիտական համալսարանի (պոլիտեխնիկ) ուսանող էր:

Yerkir.am-ի հետ զրույցում մահացած երիտասարդների ընկերներից մեկը պատմեց, որ զոհվածներից Գևորգ Պողոսյանն ամուսնացած էր, կինն էլ 5 ամսական հղի է:

Հիշեցնենք, որ վթարի հետևանքով մահացել են Տաշիր քաղաքի բնակիչներ` Վանիկ Ստեփանի Մարդոյանը, Կարեն Խաչիկի Խաչատրյանը, Գևորգ Արթուրի Պողոսյանը, Արման Հրաչյայի Տոնոյանը, Գասպար Սեդրակի Ղուկեյանը, Վահագ Վախթանգի Ալբերտյանը և Երևան քաղաքի բնակիչ Արթուր Հարությունի Բալյանը: