Բենզինով թանաքը կմաքրեն կամ թանաքը կփոխեն. ՀՀԿ-ականները դեմ են մատները թանաքոտելու պրակտիկային

ԱԺ հերթական քառօրյայում քննարկվում է ՀՀԿ պատգամավորների կողմից ներկայացված՝ «Ընտրական օրենսգրքում եւ նույնականացման քարտերի մասին» ՀՀ օրենքում փոփոխություններ եւ լրացումներ կատարելու նախագիծը, որով պետք է հստակեցվի նույնականացման քարտ ունեցողների կողմից ընտրության մասնակցելու կարգը:

ԱԺ ընդդիմադիր պատգամավոր Նիկոլ Փաշինյանը հիմնական զեկուցող՝ ԱԺ պետաիրավական հանձնաժողովի նախագահ, ՀՀԿ-ական Հովհաննես Սահակյանից հարցրեց, թե ինչո՞ւ նույնականացման քարտ ունեցողների համար չկիրառել մատները թանաքոտելու պրակտիկան: Հովհաննես Սահակյանը պատասխանեց, որ ուսումնասիրել է մատները թանաքոտելու՝ տարբեր երկրների փորձը և պարզել, որ շատ դեպքերում այդ պրակտիկան ունեցել է բացասական հետևանքներ:

«Թանաքն անցնում է մեկ այլ քաղաքացու, թանաքը բենզինով կարող են ջնջել ու կրկնակի քվեարկության գնալ: Վրաստանում մի շարք քաղաքացիներ այդ պատճառով այրվածքներ էին ստացել»,- ասաց Հովհաննես Սահակյանը:

Արձագանքեց ԱԺ նախագահ Գալուստ Սահակյանը՝ ասելով, որ ամեն ինչի մեջ էլ կարելի է խոցելի տեղ գտնել: «Թանաքը կփոխեն, եթե ուզենան»,- կարծիք հայտնեց նա: