Արցախի ԱԺ ընտրությունները չճանաչողները հենց գան ԼՂՀ, անմիջապես կփոխեն իրենց կարծիքը. ՀՀԿ-ական

Մայիսի 3-ին կայացան ԼՂՀ Ազգային ժողովի ընտրությունները: Արդեն տեղեկացրել ենք, որ տարբեր օտարերկրյա պատվիրակություններ ժամանել էին Արցախ` իրականացնելու դիտորդական առաքելություն:

ՀՀ ԱԺ պատվիրակության անդամ, ՀՀԿ-ական պատգամավոր Կարինե Աճեմյանը Yerkir.am-ի հետ զրույցում, խոսելով ԼՂՀ խորհրդարանական ընտրությունների մասին, նշեց, որ դրանք անցան շատ զուսպ ընտրապայքարում և միջազգային չափանիշներին համապատասխան:

«Մենք խմբերի ենք բաժանվել և շրջել տարբեր ընտրատեղամասերում: Անձամբ ես, ինչպես նաև կոլեգաներս, տեղյակ եմ, որ որևէ բան չեն նկատել, որը կխոսի չկազմակերպած և ոչ ժողովրդավարական ընտրությունների մասին»,- ընդգծեց նա:

Կարինե Աճեմյանը նշեց նաև, որ նկատել է, թե ինչպես են ընտրողները պարզապես տոնի վերածել այդ գործընթացը: «Արցախցիները ԱԺ ընտրությունները տոնի էին վերածել, փողոցներում կարելի էր միայն ժպտացող և ուրախ մարդկանց հանդիպել: Նրանք մեծ սիրով ու պատասխանատվությամբ էին կատարում իրենց քաղաքացիական պարտքը` մասնակցում էին ընտրություններին»,- ասաց պատգամավորը:

Անդրադառնալով այն պետությունների վարքագծին, որոնք չեն ճանաչում ԼՂՀ ԱԺ ընտրությունները, նա ասաց. «Ես այդ պետություններին միայն մեկ ուղերձ ունեմ` թող գոնե մեկ անգամ գան Արցախ, անձամբ իրենց աչքերով այդ գործընթացին և, առահասարակ, արցախցիների կյանքին հետևեն և իրենց կարծիքն անմիջապես կփոխեն»: