200 երիտասարդ ստանձնել է Քամիշլիի հայկական թաղերի ապահովությունը

Քամիշլին համարվում է Սիրիայի ամենաապահով շրջաններից մեկը, որի ընդհանուր ապահովությունը ստանձնել է քրդական YPK-ն, որը համարվում է Քրդական բանվորական կուսակցության թևը:

«Արևելք»-ին հայտնի է դարձել, որ Քամիշլիում գործում են հայկական երկու կենտրոններ և ազգային «Եփրատ» վարժարանի նախակրթարանն ու միջնակարգ դպրոցը: Դպրոցի աշակերտությունը հիմնականում հայեր են, կան նաև օտարազգի աշակերտներ:

Կենտրոններում գործում է նաև շտապօգնություն: Հայկական կենտրոններն ապահովված են դեղորայքով, որը հասանելի է հայ բնակչությանը:

Նշվում է, որ շրջանում ջրի սուր ճգնաժամ է եղել, և պատասխանատու մարմիններ տարբեր միջոցներով ջուր են տրամադրել ոչ միայն հայերին, այլև մյուս տեղաբնակներին:

«Արևելք»-ի` Քամիշլիից աղբյուրը հայտնել է, որ հայկական կենտրոնների ընդհանուր ծախսերը հոգում են շրջանի ՀՅԴ «Վան» կոմիտեն, ինչպես նաև Առաջնորդարանն ու անհատ բարերարներ: Աղբյուրի տեղեկացմամբ՝ շրջանում ծանր դեպքեր չեն գրանցվել, իսկ գիշերները գործում են շրջող մեքենաներ՝ հայկական թաղամասերի անվտանգությունն ապահովելու համար:

Շրջանի ապահովությունը ստանձնել են 200 երիտասարդներ, որոնց տրվել են հատուկ անձնաթղթեր, որպեսզի շրջանում գործող այլ ուժեր ճանաչեն նրանց:

Աղբյուրը նշում է նաև, որ հայկական շրջաններում ապրում են ամբողջական ինքնավարությամբ, և շրջանի քուրդ պատասխանատուների հետ կա համերաշխ և կառուցողական համագործակցություն: