Թուրքիայում գետնին են հավասարեցրել 200-ամյա հայկական պատմական տունը

Ներկայիս Թուրքիայի տարածքում գտնվող հայկական Մալաթիայի նահանգի Դարենդե շրջանում քանդվել է 200-ամյա պատմական հայկական տուն:

Haberler-ի հաղորդմամբ՝ Դարենդեի քաղաքապետարանը որոշում է կայացրել ապամոնտաժել շրջանի բոլոր վթարային ու կիսաքանդ շինությունները, այդ թվում` քանդվել է «Հայիք Էրթեղի» թաղամասի ամենահին տներից մեկը` ժողովրդի շրջանում «Դեմիրջիլեր Էվի» (Երկաթագործների տուն) անունով հայտնի`  20 սենյականոց 200-ամյա հայկական տունը:

Տունը մոտ 20 տարի դատարկ մնալուց հետո հայտնվել էր վթարային վիճակում, և քաղաքապետարանն այն քանդելու որոշում է կայացրել:

Տան ներկայիս սեփականատեր Հաջը Ահմեթ Սոյլեմեզը ասել է, որ այն Դարենդեի ամենահին տունն է եղել: «Այն հայերից էր մնացել: Դռները և առաստաղը փայտագործների աշխատանք էր: Դա մի մշակութային արժեք էր, որն անտերության մատնվեց ու քանդվեց»,-ասել է նա: