Ռուսաստանը պետք է լավ մտածի. Էրդողանը սպառնում է հրաժարվել ռուսական գազից

Թուրքիայի նախագահ Ռեջեփ Թայիփ Էրդողանը Ճապոնիա ուղևորվելու ճանապարհին լրագրողների հետ զրույցում խոսել է նաև Ռուսաստանի գազին այլընտրանք գտնելու մասին:

Ըստ Milliyet-ի՝ հարցին, թե Ռուսաստանը Թուրքիայի համար լավ առեւտրային գործընկեր է, և կտուժե՞ն, արդյոք, համատեղ գազային ծրագրերը ներկա իրավիճակի պատճառով, Էրդողանը պատասխանել է. «Թուրքիան ռուսական գազի թիվ մեկ օգտագործողն է։ Ռուսաստանի համար Թուրքիան մեծ կորուստ կլինի: Այդ իսկ պատճառով Ռուսաստանը պետք է լավ մտածի: Եթե հարկ լինի, Թուրքիան կկարողանա գազ գնել այլ երկրներից ու այլընտրանք կգտնի»:

Ինչ վերաբերում է Թուրքիայում Ռուսաստանի կողմից կառուցվող Աքքույու ատոմակայանին ՝ Թուրքիայի ղեկավարը վստահեցրել է` եթե ԱԷԿ-ը չկառուցի Ռուսաստանը, կկառուցի ուրիշ մեկը։ «Ռուսներն այնտեղ 3 միլիարդ դոլար են ներդրել։ Այդ պատճառով էլ դա նրանց ավելի է հետաքրքրում»,-ասել է նա:

Էրդողանի խոսքով՝ Ռուսաստանն իր քայլերի պատճառով կարող է կորցնել այդ ամենը: «Մենք նման իրավիճակներում չենք կարող զգացմունքային լինել»,- հավելել է նա: