Ազնավուրը պատրաստ է օգնել Եվրոպա ներգաղթածներին

Վերջին օրերին Եվրոպան լուծումներ է փնտրում` ամեն օր ժամանող բազմաթիվ միգրանտներին օգնելու համար: Աշխարհահռչակ երգիչ Շառլ Ազնավուրը պատրաստակամություն է հայտնել իր տանն ընդունել նրանցից ոմանց. տեղեկացնում է ֆրանսիական Closer պարբերականը:

Այս երեքշաբթի նա նոր համերգաշար է սկսում: Բազմազբաղ արտիստը որոշել է նաև իր շոուն հիմնել, որը խորհրդանշական անուն ունի` «Ներգաղթյալներ»: Նա պարզաբանել է, որ շատ մտահոգված է փախստականների վիճակով, չէ՞ որ իր ծնողներն էլ Հայաստանից են գաղթել Ֆրանսիա: «Ահա, թե ինչու ես մշտապես կլինեմ նրանց կողքին, ովքեր թակում են դուռը, այլ ոչ նրանց` ովքեր փակում են այն»,- ասել է նա:

Պատրաստ ամեն ինչի` բազմաթիվ ներգաղթյալներին օգնելու համար, Ազնավուրը որոշել է նրանցից ոմանց իր տանն ապաստան տալ: «Ես պատրաստ եմ ընդունել միգրանտների: Ես միջոցներ ունեմ` շարժական տուն գնելու համար, նաեւ` տարածք` այն տեղադրելու համար»,- ասել է Ազնավուրն ու ժպտալով հավելել. «Ո՞վ գիտե, գուցե նրանց մեջ ապագա Ազնավուրներ կան»:

Ի դեպ, մի քանի օր առաջ RTL-ն (Եվրոպայում հեռարձակող հեռուստառադիոընկերություն) նույնպես անդրադարձել էր Ազնավուրի այդ նախաձեռնությանը, ընդ որում` ֆրանսիական շանսոնի լեգենդը, ըստ լրատվամիջոցի, ասել էր, որ կնախընտրեր ապաստան տալ հատկապես հայերին` «նույն լեզվով խոսելու համար», նաեւ` «որպեսզի նրանք իրենց կորսված չզգան»: