Դպրոցի տնօրենը չի բացառում, որ Զարզանդ Նիկողոսյանին կրկին փոխտնօրեն կնշանակեն

Սյունիքի մարզպետ Սուրիկ Խաչատրյանի օգնական Զարզանդ Նիկողոսյանը մոտ տասն օր առաջ նշանակվել էր Կապանի թիվ 6 դպրոցի փոխտնօրեն, սակայն երկու կարմիր դիպլոմ ունեցող Նիկողոսյանի` փոխտնօրենի կարիերան շատ կարճ տևեց` ընդամենը մեկ ոչ լրիվ օր: ՀՀ ԿԳ նախարար Արմեն Աշոտյանը Զարզանդ Նիկողոսյանին աշխատանքից ազատելը վերագրեց իրեն, Սյունիքի ամենակարող մարզպետ Սուրիկ Խաչատրյանն էլ հայտարարեց, թե ինքն է նման որոշում կայացրել:

Ուշագրավ է, որ դպրոցի տնօրեն Մարինե Դավթյանը Yerkir.am-ի հետ զրույցում ասել էր, որ ինքն անձամբ է հրավիրել Նիկողոսյանին` աշխատելու իրենց դպրոցում, քանի որ ուսուցչական կոլեկտիվի, ծնողների ու երեխաների կողմից սիրված անձնավորություն է: Դավթյանն այսօր էլ Yerkir.am-ի հետ զրույցում հայտարարեց` ինքը շարունակում է մնալ նույն համոզմանը, որ Զարզանդ Նիկողոսյանն ունի համապատասխան փաստաթուղթ, արժանիքներ` դպրոցի փոխտնօրեն լինելու համար:

«Իր մանկավարժական հմտություններով, աշխատանքային գործունեությամբ այս կարճ ժամանակահատվածում մարդն իրեն դրսևորեց այնպես, որ իսկապես ընդունվեց և՛ կոլեկտիվի, և՛ աշակերտների կողմից: Նույն ձևով հիմա ասում եմ` դա եղել է որոշում, դա եղել է կոլեկտիվի նախաձեռնություն, առաջարկություն: Նրանք բոլորը սիրում են Զարզանդ Նիկողոսյանին: Ի վերջո, դպրոցի կյանքով ինձանից ավելի մտահոգ` չեմ կարծում, որ մեկը գտնվի»,- ասաց տնօրենը` հավելելով. «Ես պետք է ասեմ, որ չէի հասցրել մարզպետի հետ խորհրդակցել այդ հարցով, անկեղծ եմ ասում, որ դա իմ կողմից վրիպում էր: Այդ հրամանը չտրվեց, որոշումը ժամանակավորապես չեղյալ համարվեց»:

Մեր ճշտող հարցին` եթե ժամանակավորապես է չեղյալ հայտարարվել Զարզանդ Նիկողոսյանի` փոխտնօրեն նշանակվելու որոշումը, արդյոք չի՞ նշանակում, որ առաջիկայում նա կրկին կնշանակվի փոխտնօրենի պաշտոնում, Դավթյանը պատասխանեց. «Իմ կարծիքով` Նիկողոսյանն այն մարդն է, ով արժանի է լինել մեր դպրոցի փոխտնօրենը: Պարզապես, խորհրդակցելով մեր` Սյունիքի մարզպետի հետ, այս պահին նպատակահարմար չենք գտել, որ նա փոխտնօրենի պաշտոնում աշխատի»:

Մեր դիտարկմանը, թե փոխտնօրենի պաշտոնին հավակնողը մանկավարժի` առնվազն հինգ տարվա աշխատանքային փորձ պետք է ունենա, դպրոցի տնօրենը պատասխանեց. «Դրա համար էլ այդ որոշումը չեղյալ է համարվել: Իհարկե, նա ունի աշխատանքային ստաժ` Գորիսի զորամասում աշխատել է` որպես կազմակերպիչ: Դա մանկավարժական չի համարվում, և հենց դրա համար էլ այս պահին այդ որոշումը չեղյալ է համարվել»:

Հարցին, թե Զարզանդ Նիկողոսյանին այդ պաշտոնում նշանակելիս ինչո՞ւ հաշվի չի առել այդ հանգամանքը, պատասխանեց. «Դե, դրա համար էլ ասում եմ, որ վրիպում եմ թույլ տվել: Ես որոշել էի, բայց չէի խորհրդակցել, և այդ մի հարցն էլ ուշադրությունիցս վրիպել էր, որ իրավունք չունեի»: