կարևոր
1171 դիտում, 4 օր առաջ - 2024-06-11 15:11
Հասարակություն

Կիրանցի դպրոցի տնօրենը բնակիչների հետ կքննարկի կառավարության՝ նոր դպրոցի կառուցման առաջարկը

Կիրանցի դպրոցի տնօրենը բնակիչների հետ կքննարկի կառավարության՝ նոր դպրոցի կառուցման առաջարկը

Կիրանցի դպրոցի տնօրենը շուտով կհանդիպի աշակերտների ծնողների հետ՝ հասկանալու համար, թե ո՞ր դպրոց պետք է հաճախեն աշակերտները սեպտեմբերից: Այս մասին այսօր՝ հունիսի 11-ին, NEWS.am-ին հայտնեց Կիրանցի դպրոցի տնօրեն Վոլոդյա Բաբինյանը՝ նշելով, որ այս պահին դպրոցի նորակառույց շենքը դեռևս չի շահագործվում. քննությունները  ընթանում են դպրոցի հին շենքում, որը սահմանից ավելի հեռու է, քան նորը:

Վոլոդյա Բաբինյանն՝ իր խոսքով, չի կարող միանձնյա որոշում կայացնել՝ թե որտեղ հաճախեն աշակերտները նոր ուսումնական տարում, այդ պատճառով էլ հանդիպում է նախաձեռնել բնակիչների հետ:

Մեզ հետ զրույցում նա նշեց, որ իրենք շարունակում են աշխատել  դպրոցի հին շենքում, որը սահմանից փոքր ինչ ավելի հեռու է գտնվում, քան նորակառույցը:

Հարցին, թե արդյո՞ք կառավարությունից պարզաբանել են՝  եթե բնակիչներն ամեն դեպքում համաձայնեն նոր դպրոցի կառուցման՝ կառավարության առաջարկին, որքան ժամանակ կպահանջվի դպրոցի կառուցման համար և որտեղ այն կգտնվի, Վոլոդյա Բաբինյանը պատասխանեց, որ այդ մասին դեռևս ոչինչ հայտնի չէ իրեն:

Հիշեցնենք, որ հունիսի 5-ին, ԱԺ-ում 2023 թվականի պետական բյուջեի կատարողականի քննարկման ժամանակ ԿԳՄՍ նախարար Ժաննա Անդրեասյանը՝ անդրադառնալով Կիրանցի բնակիչների մտավախությանը, թե սահմանազատման և սահմանագծման հետևանքով նորակառույց դպրոցը սահմանին չափից դուրս մոտ է գտնվելու և երեխաները այդտեղ դպրոց հաճախել չեն կարող, ասել էր.

«Անվտանգության հավելյալ միջոցառումներ են ձեռնարկվում: Մենք պատրաստ ենք շահագործել թե՛ նոր դպրոցի այն շենքը, որը կառուցվել է այդ միջոցառումները ձեռնարկելուց հետո, թե՛ (եթե տեղի բնակիչների պահանջը կլինի, որ դրանից հետո նույնիսկ իրենք հարմար չեն գտնում երեխաներին ուղարկել այդ շենքում դասերն անցկացնելու) կառուցել նոր դպրոց և այդ շենքը ծառայեցնել այլ նպատակի:

Այսինքն՝ ունենք առնվազն երկու տարբերակ, և այդ տարբերակներից ո՛րն ընտրել, կլինի անմիջապես բնակիչների, տեղում բնակվող մարդկանց առաջարկով ու նաև նրանց՝ ավելի հարմար տարբերակով»: