Համայնքի դեմքը դպրոցն է․ Ջրահովիտի դպրոցի տնօրենը՝ դպրոցի հնարավոր փակման մասին

Արարատի մարզի Ջրահովիտ գյուղի բնակիչներն այսօր փակել էին գյուղի ճանապարհը․գյուղացիները բողոքում են, որ Կառավարությունը համայնքների խոշորացումից հետո որոշում է կայացրել, որ Ջրահովիտ և Արևաբույր համայնքները մեկ դպրոց պետք է ունենան։ Yerkir.am-ի հետ զրույցում  Ջրահովիտի դպրոցի տնօրեն Սիլվա Գրիգորյանն ասաց, որ մասնագետների ուսումնասիրութունից հետո դպրոցը ոչ սեյսմակայուն են գնահատել, և անհրաժեշտ են համարել նոր դպրոց կառուցել։ Ըստ ամենայնի՝ ծրագիրը հաստատվել է, բայց նոր դպրոցը պետք է Արևաբույրում կառուցվի։

«Այս պահին միավորման մասին չեմ կարող ասել, որովհետև հստակ հանձնարարական չենք ստացել»,-ասաց Սիլվա Գրիգորյանը։

Մեր այն հարցին, թե՝ հնարավոր միավորվելու դեպքում ինչ դժվարությունների առջև կկանգնեն աշակերտները, տնօրենն ասաց․  «Ծնողների մտահոգությունն այն է, որ եթե հանկարծ Ջրահովիտի դպրոցը միավորվի, այլ դպրոց տանող 2 ճանապարհները վտանգավոր են։ Մեկն անցնում է ջրատար մեծ կանալի կողքով, որտեղ, նույնիսկ, համայնքի բնակիչ է ընկել ու խեղդվել, իսկ մյուս ճանապարհը գերեզմանատան կողքով է անցնում․ այսինքն, զուտ աշակերտների տեղաշարժի առումով, նախ բավական հեռու է, և երկրորդ՝ անվտանգ չէ»,-ասաց տնօրենը։

Սիլվա Գրիգորյանի խոսքով՝ դպրոցն այս պահին ունի 164 աշակերտ, 22 ուսուցիչ։

«Լավատես եմ և վստահ եմ, որ յուրաքանչյուր համայնք կունենա իր դպրոցը, որովհետև համայնքի դեմքը դպրոցն է, նաև վստահ եմ, որ խնդիրը կկարգավորվի ու այս միջհամայնքային ավելորդ իրավիճակը չի ստեղծվի»,-ասաց Սիլվա Գրիգորյանը։

Հերմինե Զեյնալյան