Կառավարությունը պետք է չեղյալ համարի համալիրի վաճառքի գործարքը. Սուրեն Զոլյան

Հանրային խորհուրդը Մարզահամերգային համալիրի վաճառքի հարցը չի քննարկել, քանի որ այս ընթացքում խորհրդի անդամներից շատերն արձակուրդում են եղել: Այս մասին լրագրողներին ասաց քաղաքագետ, Հանրային խորհրդի անդամ Սուրեն Զոլյանը՝ խոստովանելով, որ, միևնույն է, այսօր ոչ ոք Հանրային խորհրդի կարծիքի հետ հաշվի չի նստում:

Զոլյանի խոսքով՝ համալիրը վաճառելիս կառավարությունը խախտել է գործող օրենքը, ինչպես դա արեց Որոտանի կասկադի վաճառքի ժամանակ: Ըստ նրա՝ համալիրի վաճառքի հարցը գոնե պետք է ԱԺ-ում քննարկման դրվեր:

«Կառավարությունն ի՞նչ գործ ունի, որ իրեն դրել է վաճառողի տեղ: Եթե ի վիճակի չէր տնօրինել, թող այլ պետական կառույցի տնօրինությանը հանձներ, ոչ թե վաճառեր: Կառավարության անդամներից որևէ մեկը լումա ունեցե՞լ է համալիրի կառուցման գործում, որ վաճառել է»,- դժգոհեց Զոլյանն ու հավելեց, որ հանրության արձագանքի արդյունքում կառավարությունը պետք է չեղյալ հայտարարի վաճառքի գործարքը:

Սակայն, ըստ նրա, հասարակությունն այսօր թույլ է, որպեսզի կարողանա նման պահանջներ ներկայացնել, մի բան էլ` կանխել, որպեսզի հետագայում նման` արժեք ներկայացնող շինությունները նույն ճակատագիրը չունենան: