Եթե կառավարությունը որոշի չեղյալ հայտարարել Որոտանի գործարքը, ՀԱԿ պատգամավորը դա կողջունի

 Որոտանը, ինչպես գազն ու հոսանքը, Սևանա լճի հարցը ԱԺ ՀԱԿ պատգամավոր Արամ Մանուկյանի համար ոչ միայն տնտեսական լուրջ լծակներ են, այլև պետականության ու անկախության` ռազմավարական նշանակություն ունեցող արժեքներ: Եվ եթե քաղաքական գործիչներն ու քաղաքացիական հասարակությունը պայքարում են դրա համար, ուրեմն հայրենիքը չթուլացնելու համար է այդ պայքարը:

Այսօր լրագրողների հետ հանդիպման ժամանակ, պատասխանելով Yerkir.am-ի այն հարցին, թե ի՞նչ ճակատագիր է սպասվում Որոտանին, որովհետև մամուլում խոսվում է, թե կառավարությունը հակված է չեղյալ համարել Որոտանի վաճառքի գործարքը, Արամ Մանուկյանը պատասխանեց, որ քառյակը նախապատրաստում է նյութեր` Որոտանի հետ կապված, և քառյակում կարծիք կա, որ այդ գործարքը թե' քաղաքական, թե' իրավական տեսակետից հանցագործություն է պետության նկատմամբ: Ինքը` պատգամավորը, այդ հարցով դիմել է դատախազություն, քառյակն էլ հակված է Որոտանի հարցով լինել հետևողական:

«Փառք Աստծո, որ կան ուժեր` քաղաքական ու քաղաքացիական, որ կռիվ են տալիս` պետականությունը փրկելու համար: Ես լավատես եմ, որ ինչ-որ բաներ զսպելու ենք, ինչ-որ բանի հասնելու ենք»,- ասաց Արամ Մանուկյանը:

Ինչ վերաբերում է կառավարության կողմից Որոտանի գործարքը չեղյալ համարելու որոշման հավանականությանը, պատգամավորը նշեց, որ ընդդիմության նպատակը չէ իշխանության ջարդվելուց ուրախանալ, այլ երկրի հաջողությունները տեսնելն է, և եթե իշխանությունը թեկուզ վերջին պահին սթափվի ու որոշի ինչ-որ բան ուղղել, պատգամավորը միայն կողջունի կառավարության այդ քայլը:

«Որոտանի գործարքը միանշանակ պետք է չեղյալ հայտարարվի` խախտվել են Սահմանադրությունը և օրենքները: Այն վաճառվել է ինքնարժեքից մի քանի անգամ էժան գնով»,- ասաց պատգամավորը: Իսկ թե ինչո՞ւ է որոշվել «ջրի գնով» վաճառել Որոտանը, պատգամավորը կարծում է, որ դրա պատճառը շատ պարզ է` կառավարությանը շտապ փող է պետք: