Փաշինյանը չի մասնակցի քվեարկությանը, որովհետև կառավարությունը չի պատասխանում իր հարցերին

Այսօր ԱԺ` կառավարության նախաձեռնած արտահերթ նիստում քննարկվում է ՀՀ նախագահի ներկայացրած` ՀՀ կառավարության և ՌԴ կառավարության միջև կնքված` ՀՀ կառավարությանը 200 միլիոն դոլարի չափով պետական արտահանման վարկ տրամադրելու մասին համաձայնագրի վավերացման հարցը:

Ելույթ ունեցավ ԱԺ ընդդիմադիր պատգամավոր Նիկոլ Փաշինյանը: Ըստ նրա` կա մի հանգամանք, որը պետք է պարզաբանվի, և դա օրեր առաջ երկրի նախագահի արած հայտարարությունն էր, որ մինչ ՀԷՑ-ում աուդիտի պատասխանը կառավարությունն իր վրա կվերցնի էլեկտրաէներգիայի սակագնի բարձրացման բեռը, և գումարները կվերցվեն անվտանգության ամրապնդմանն ուղղված միջոցներից:

Նիկոլ Փաշինյանը նշեց, որ մինչ հիմա որևէ պաշտոնյա հստակ պարզաբանում չի տվել, թե ինչ միջոցներից է տրամադրվելու այդ գումարը, իսկ անվտանգության ճեղքը փակելու համար վարկ ենք վերցնում Ռուսաստանից՝ ավելացնելով Հայաստանի արտաքին պարտքը:

«Ստացվում է, որ ՀԷՑ-ում ստեղծված թալանի մթնոլորտի համար ուղղակի կամ անուղղակի ձևով բեռը դրվում է կրկին քաղաքացիների վրա»,- ասաց պատգամավորը՝ հավելելով, որ քանի դեռ իր հարցերին կառավարությունից ոչ ոք պարզաբան չի տվել, ինքը չի կարող կողմ կամ դեմ տեսակետ հայտնել և չի մասնակցելու քվեարկությանը: