Եկեք` մի քիչ իրատես լինենք. ԲՀԿ-ական պատգամավորը՝ բողոքի ակցիաների մասին

ԱԺ ԲՀԿ խմբակցության պատգամավոր Միքայել Մելքումյանն այսօր լրագրողների հետ զրույցում նշեց, որ էլեկտրաէներգիայի սակագնի բարձրացման դեմ քաղաքացիական հասարակության բողոքի ներկա փուլում կտրուկ զարգացումներ չի ակնկալում:

«Շատ կտրուկ զարգացումներ չեմ ակնկալում: Չեմ բացառում, բայց չեմ էլ տեսնում: Ես այս խնդիրը չեմ համեմատում տրանսպորտի թանկացման հետ: Դրանք բավականին տարբեր խնդիրներ են: Իհարկե, ոչ ոք ոգևորված չէ սակագնի բարձրացմամբ, քանի որ դա բոլորիս է վերաբերում: Թե քաղաքացիական շարժումն ի՞նչ ուղղությամբ կգնա, չեմ կարող ասել»,- նշեց պատգամավորը:

Անդրադառնալով այն հարցին, թե «Ոչ թալանին» նախաձեռնության կազմակերպած բողոքի ցույցին ԲՀԿ-ն կունենա՞մասնակցություն, Մելքումյանը պատասխանեց. «ԲՀԿ-ն չի քննարկել «Ոչ թալանին» նախաձեռնության` այսօր կազմակերպելիք բողոքի ցույցին միանալու հարցը: Մենք` որպես քաղաքական ուժ, միշտ էլ պատրաստ ենք քննարկել հասարակությանը հուզող ցանկացած սոցիալական խնդիր: Եթե լինի անհրաժեշտություն, որ քաղաքական ուժը միջամտի, և դա էլ տանի խնդրի լուծման, մենք մեր քայլերն անպայման կանենք: Բայց եթե մենք տեսնում ենք, որ այդ պայքարը ինչ-որ կետի է տանելու... Չեմ ուզում նորից հետ գնալ և ձեզ ու մեզ հայտնի պատմությունը հիշել: Եկեք` մի քիչ իրատես լինենք»:

Մելքումյանն ասաց նաև, որ դեմ չէ, որ պայքարը նախաձեռնողները հաջողության հասնեն իրենց փոխարեն: «Թող հասնեն հաջողության ում փոխարեն ուզում են: Մենք նման ամբիցիաներ չունենք»,- ասաց ԲՀԿ-ականը: