860 տարվա ազատազրկում՝ Հրանտ Դինքի սպանության գործով մեղադրյալ ոստիկանապետին

Անկարայի գլխավոր դատախազությունը պահանջել է Տրապիզոնի հետախուզության վարչության նախկին պետ Ռամազան Աքյուրեքին 240-ից 860 տարվա ազատազրկման ենթարկել՝ թուրք քաղաքական 48 գործիչների, այդ թվում` նախկին վարչապետերից Նեջմեթթին Էրբաքանին, գործարարների, լրագրողների և պաշտոնյաների ապօրինի գաղտնալսելու համար:

Ըստ Demokrathaber-ի՝ նախկին ոստիկանապետի նկատմամբ սկսված հետաքննությունն ավարտվել է, և Ռամազան Աքյուրեքն ու Օմեր Ալթըփարմաքի մեղադրվել են «կազմակերպություն ղեկավարելու» մեջ: Դատախազը 40 տարբեր գործողություն իրականացնելու մեջ մեղադրվող Աքյուրեքի համար պահանջել է 240-ից մինչև 860, իսկ մյուս ոստիկանապետ Ալթըփարմաքի համար՝ մինչև 704 տարվա ազատազրկում:

Կրոնական գործիչ Ֆեթուլլահ Գյուլենի հետ իր մտերմությամբ աչքի ընկնող Աքյուրեքը Հրանտ Դինքի սպանության ժամանակ Տրապիզոնի ոստիկանությունում պաշտոն էր զբաղեցնում:

Հիշեցնենք, որ նաեւ Հրանտ Դինքի սպանության գործով մեղադրյալ Աքյուրեքը ոստիկանությանը ներկայացրած վերջին զեկույցում հայտնել էր, որ նախօրոք տեղյակ է եղել Դինքի դեմ իրականացվելիք «աղմկահարույց գործողությունից», սակայն չի տեղեկացրել Տրապիզոնի` այդ ժամանակվա մարզպետին և նահանգի ոստիկանությանը՝ իբր ոչ միտումնավոր: