Հրանտ Դինքի սպանության բացահայտման գործով դատավարությունը դարձյալ հետաձգվեց

Թուրքիայում, ծանր հանցագործությունների 5-րդ դատարանի որոշմամբ, դարձյալ հետաձգվեց «Ակօս» թերթի խմբագիր Հրանտ Դինքի սպանության բացահայտման  գործով դատավարությունը:

Ըստ HyeTert-ի՝ սպանության գործով նիստին ամբաստանյալները ներկա չեն եղել, սակայն ներկա են եղել Դինքի ընկերները, փաստաբաններն ու քրդամետ Ժողովուրդների դեմոկրատական կուսակցության անդամներից Ֆիլիզ Քերեսթեջիօղլուն:

Դատարանի որոշմամբ՝ Դինքի սպանության գործով դատավարությունը հետաձգվել է մինչև սեպտեմբերի 3-ը:

Մինչ դատավարությունը Դինքի մտերիմները հավաքվել են ու պաստառներ պարզել «Բոլորս Հրանտ ենք, Բոլորս հայ ենք», «Ոճրագործ պետությունը պատասխան է տալու», «Մինչև մենք չասենք «վերջ», այս դատը չի ավարտվի» գրություններով: Հրանտ Դինքի ընկերների կողմից հայտարարությամբ հանդես եկած Ֆիգեն Շաքաջըն ասել է. «Մենք, լինելով Հրանտի, Սևակի և 1915 թվականին սպանված հայերի ընկերները, շարունակելու ենք արդարութան  պահակ կանգնել և բոլոր նրանց, ովքեր խիղճ ունեն, հրավիրելու ենք` մեզ հետ հերթապահելու»: