Հայոց գենը հավերժելու է. ՀՀԿ-ականի ձոնը՝ նախագահի աշխատակազմի ղեկավարին

Այսօր ԱԺ մշտական հանձնաժողովներում շարունակվում են 2014թ. բյուջեի կատարողականի քննարկումները:

ՀՀ նախագահի աշխատակազմի ղեկավար Վիգեն Սարգսյանը ներկայացնում էր հաշվետվություն: ՀՀԿ-ական Մկրտիչ Մինասյանը ցանկացավ հարց ուղղել Վիգեն Սարգսյանին, որը, սակայն, ավելի շատ պաթոս-ելույթ էր:

«Իմ սերնդի մարդիկ հիշում են, թե մենք ինչ զարթոնք ապրեցինք 60-70-ական թվականներին` Տիգրան Պետրոսյանի հաղթանակը, Երևան-Էրեբունի տոնակատարությունները, «Արարատ» թիմի հաղթանակը: Վերջին միջոցառումը, որն անցկացվեց ողջ հայ ժողովրդի կողմից` Հայոց ցեղասպանության 100-ամյա տարելիցի միջոցառումները, ապացուցեցին, որ անգերազանցելի աշխատանք է արված, որ հայոց գենը հավերժելու է, որ նախորդ դարերի հին ժողովուրդը նաև ապագայի ժողովուրդ է: Վերջին օրը ինչ փառահեղ գեղարվեստական ու մշակութային միջոցառում էր` բարձր մակարդակով, յոթ տարեկան հանճարեղ մանչուկի նվագով: Բրավո բոլոր կազմակերպիչներին: Տարիների բարդ աշխատանք է կազմակերպել այս ամենը: Պիտի հարցնեմ` ի՞նչ դժվարություններ ստեղծեցին մեր ոխերիմ թշնամիները այս միջոցառումները իրականացնելու ճանապարհին»,- հարցրեց պատգամավորը: