Վերջին զանգին ղեկը շրջանավարտին վստահելը ծնողի համար 30 հազար դրամ կարժենա

Այն ծնողները, ովքեր Վերջին զանգի օրը մեքենայի ղեկը կվստահեն շրջանավարտներին, կպատժվեն օրենքով: Այս մասին այսօր լրագրողներին հայտնեց ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:

«Ներողամտություն չի լինելու, որովհետև նախորդ տարվա փորձը ցույց տվեց, որ մեր խստապահանջության արդյունքում կարողացանք օրն ավարտել առանց միջադեպերի»,- ասաց նա:

Սարգսյանը խորհուրդ տվեց վարորդներին` ուշադիր լիենել հատկապես դպրոցամերձ շրջաններում: Ոստիկանությունը Վերջին զանգի օրը հիմնական ուժերն ու միջոցները կենտրոնացնելու է ավագ դպրոցների մոտակայքում: «Փորձելու ենք այդ օրն ամեն ինչ անել, որպեսզի ոչ մի շրջանավարտ միջադեպի մասնակից չդառնա»,- ասաց նա և հավելեց, որ ոստիկանության հսկողությունը կտևի մոտ մեկ ամիս՝ մինչև քննական շրջանի ավարտը:

Դիտարկմանը, թե նա այդ օրը ստիպված չի՞ լինելու հեռախոսն անջատել, որպեսզի միջնորդություններ չլինեն, ոստիկանության պաշտոնյան պատասխանեց. «Թող ներող լինեն իմ բոլոր ընկերները, հարազատները, ես չեմ միջնորդելու երեխաներին պատասխանատվությունից ազատելու հարցում: Ես տասնյակ դպրոցներում հանդիպել եմ աշակերտների հետ և նրանց հայտնել իմ խստապահանջության մասին: Ես չեմ պատրաստվում այդքանից հետո որևէ մեկի միջննորդությունը կատարել»:

Սարգսյանի խոսքով՝ մեկ անգամ վարորդական իրավունք չունեցող անձին ղեկ վստահելը ծնողի համար կարժենա 30 հազար դրամ: