«Մեր դպրոցն էնքան լավն է, որ մեր Վերջին զանգին ԿԳ նախարարն ու մարզպետն են եկել»

Տեղեկացրել էինք, որ այսօր ՀՀ ԿԳ նախարար Լևոն Մկրտչյանը մասնակցեց Արմավիրի մարզի Գետաշեն համայնքի դպրոցի շրջանավարտների Վերջին զանգի արարողությանը:

Տոնական արարողությունը սկսվեց` զոհված զինծառայողների հիշատակը մեկ րոպե լռությամբ հարգելով: Նախարարն այնուհետև նշեց, որ ուզում էր այդ դպրոցն այցելել, քանի որ մեր երկրի հենքն ու ուժը մեր ժողովուրդն է, և եթե մեր գյուղերում ու համայնքներում կարողանում ենք նման գեղեցիկ պատկեր ստանալ, նշանակում է՝ պետք է ունենանք ապագա կերտելու իրավունք։

«Դուք կյանք եք մտնում և երկար ճանապարհ ունեք գնալու, և այդ ճանապարհի ընթացքում կլինեն հաջողություններ և անհաջողություններ։ Երբեք չի լինում, որ կյանքը լինի միշտ հաջող կամ միշտ անհաջող։ Պետք է ձեր սխալից չվախենաք և առաջ գնաք՝ միշտ հիշելով, որ յուրաքանչյուր քայլից հետո պետք է հարցնել՝ ինչո՞ւ, ինչո՞ւ եք այդ քայլն անում, ինչո՞ւ եք այդ ճանապարհը ընտրել։ Թուրքիզմի հիմնադիր Զիա Գեոքալփը ասում էր՝ թե Թուրքիան պետք է փրկի թուրք երիտասարդը, իսկ հարցին, թե ինչպիսի՞ն պետք լինի թուրք երիտասարդը, պատասխանում էր` ամենաառաջավոր, եվրոպական կրթություն ստացած, բայց նրա սրտում պետք է բաբախի բարբարոս, քոչվոր մեր նախնիների սիրտը։ Մենք էլ հիմա վստահ պետք է ասենք, որ մեզ պետք է փրկի հայ երիտասարդը, որը պետք է ունենա ամենաբարձր կրթությունը, բայց մեր սրտում պետք է բաբախի մեր 5000 տարվա քաղաքակրթությունը»,- ասաց նախարարը`  շրջանավարտներին հաջողություն մաղթելով:

Իսկ թե ինչպես էին պատրաստվել Վերջին զանգի արարողությանը շրջանավարտները, դիտեք տեսանյութում: