Նախկին վարչապետը գովեց գործողին

ՀՀ նախկին վարչապետ Արմեն Դարբինյանը վարչապետների ակումբի հանդիպմանը չի մասնակցել, քանի որ երկրում չի եղել: Այս մասին լրագրողների հետ զրույցում ասաց հենց ինքը՝ Դարբինյանը: Նրա հավաստմամբ` եթե երկրում լինի, ապա հաջորդ հանդիպմանը կմասնակցի:

«Ողջունում եմ վարչապետի կողմից նման նախաձեռնությունը: Ճիշտ է, որպես ակումբային գործունեություն` դժվար շատ էֆեկտիվ լինի, քանի որ կարծում եմ, որ ավելի գերադասելի կլինեին առանձին-առանձին հանդիպումները, բայց դա վարչապետի որոշելիքն է»,- ասաց Դարբինյանը:

Հարցին, թե ինչպե՞ս է գնահատում վարչապետ Հովիկ Աբրահամյանի գործունեությունը, պատասխանեց, թե, իր կարծիքով, Աբրահամյանն անում է իր հնարավորությունների առավելագույնը: Հարցին ի պատասխան, թե, առավելագույն ասելով, ի՞նչ նկատի ունի, Դարբինյանը կոչ արեց չսադրել:

«Որևէ մեկին վիրավորելու ու պիտակներ կպցնելու ցանկություն չունեմ: Բոլորիս ցանկությունը պետք է այն լինի, որ ՀՀ վարչապետը լինի հաջողակ, եթե վարչապետը լինի հաջողակ, բոլորս կլինենք ու, կներեք արտահայտությունս, բարգավաճ»: